«Qazatomónerkásip» Ulttyq atom kompanııasy» AQ alǵashqy toqsanda tabıǵı ýran óndirýdi 63 paıyzǵa ulǵaıtty
ALMATY. Sáýirdiń 21-i. QazAqparat /Erlik Erjanuly/ - Qazaqstan 2010 jyldyń birinshi toqsanynda 4060 tonna tabıǵı ýran óndirdi. Bul ótken jyldyń osy kezeńimen salystyrǵanda 63 paıyzǵa kóp.
Bul «Qazatomónerkásip» Ulttyq atom kompanııasy» AQ 1-shi toqsandaǵy qyzmetiniń qorytyndysynda málim bolyp otyr, dep habarlaıdy QazAqparat kompanııanyń baspasóz qyzmetine silteme jasap.
Kompanııa mundaı qarqyndy ósimge ózine qarasty kásiporyndarda óndiris kólemin ulǵaıtý men «Baıken-U» men «Qyzylqum» JShS-teriniń jańa kenishterinde ýran óndirýdi bastap, «Aqbastaý» BK» AQ-da tájirıbelik óndiristi qolǵa alýdyń arqasynda qol jetkizip otyr. Alǵashqy toqsanda jalpy tabys 46 mıllıard 903 mıllıon teńgeni qurap, 2008 jyldyń sáıkes kezeńindegi kórsetkishten (9 mıllıard 504 mıllıon) 25 paıyzǵa asyp tústi. Al negizgi qyzmetten túsetin tabys 19 paıyzǵa ulǵaıyp 43 mıllıard 97 mıllıon teńgege jetti. Ýran ónimderin ótkizý kóleminiń artýy tabystyń negizgi kirisine aınaldy.
Endi ekinshi toqsanda myna is-sharalar josparlanyp otyr. Birinshi, Yńǵaı ken ornynyń («Yńǵaı» BK» JShS) 2-ýchaskesinde Satellıt-1 seriktes zaýytyn iske qosý. Bul tabıǵı ýran óndirýden bastap ýran totyǵy-shala totyǵyn alýǵa deıingi úzdiksiz óndiristik tsıkldy jasaýǵa jáne ónim shyǵarýǵa ketetin shyǵyndardy azaıtýǵa múmkindik beredi. Ekinshi, Qyzylorda oblysynyń Jańaqorǵan aýdanyna qarasty Baıkenje aýyldyq okrýgy aýmaǵynda «Baıken-U» JShS-niń 245 adamdyq vahtalyq turǵyn úı kesheni paıdalanýǵa tapsyrý. Úshinshi, «Qarataý» JShS-i ıgerip jatqan «Býdenovskoe» ken ornynynyń 2-ýchaskesinde jer asty uńǵymaly shaımalaý ádisimen tájirıbelik-ónerkásiptik ýran óndirý kólemi ulǵaıtylady. Bul toqsanda sondaı-aq, Qazatomónerkásip pen japondyq «Sumitomo Corp.» kompanııasynyń sırek jáne sırek-jer metaldar salasyndaǵy Summit Atom Rare Earth Company (SARECO) birikken kásiporny óz jumysyn bastaıdy. Bul týraly kelisimge taraptar bıyl naýryz aıynda qol qoıǵan bolatyn. Onda «Qazatomónerkásiptiń» úlesi - 51, al «Sumitomo Corp.» úlesi 49 paıyzdy qurap otyr. Birlesken jańa kásiporyndy qurýdaǵy basty maqsat - qosymsha quny joǵary sırek jáne sırek-jer metall ónimderin óndiretin satylas yqpaldasqan kompanııa qurý.
