«Qazatomónerkásip» kompanııasynyń ústinen tekserý júrgiziledi
NUR-SULTAN. QazAqparat - QR Eńbek jáne halyqty áleýmettik qorǵaý mınıstrligi «Qazatomónerkásip» kompanııasynyń ústinen tekserý júrgizedi. Bul jaıynda atalǵan mınıstrliktiń baspasóz hatshysy Qanat Qulshymanov Feısbýktegi paraqshasynda jazdy, dep habarlaıdy qazAqparat tilshisi.
Onyń jazýynsha, áleýmettik jelilerde «Qazatomónerkásip» UAK» AQ-nyń birneshe qyzmetkeriniń jalaqylaryn qysqartýǵa jáne razrıadyn tómendetýge qatysty narazylyq bildirgen vıdeo-habarlamasy taralǵan.
«Qazaqstan Respýblıkasy Kásipkerlik kodeksiniń 144-babynyń 3-tarmaǵynyń 6) tarmaqshasyna sáıkes memlekettik organdardyń adam ómirine, densaýlyǵyna, qorshaǵan ortaǵa jáne jeke jáne zańdy tulǵalardyń, memlekettiń zańdy múddelerine zııan keltirý boıynsha naqty faktiler týraly jáne Qazaqstan Respýblıkasy zańnamasynyń talaptaryn buzý boıynsha naqty faktiler týraly ótinishteri jospardan tys tekserýge negiz bolady. Atalǵan faktilerdi joımaý azamattardyń ómiri men densaýlyǵyna zııan keltirýge ákep soǵady. Osyǵan baılanysty, Qazaqstan Respýblıkasynyń Eńbek jáne halyqty áleýmettik qorǵaý mınıstrligi Eńbek, áleýmettik qorǵaý jáne kóshi-qon komıteti «Qazatomónerkásip» UAK» AQ-da jospardan tys tekserý júrgizý týraly Nur-Sultan qalasynyń Qalalyq orta sapasy jáne baqylaý basqarmasyna hat joldady. Tekserý nátıjeleri qosymsha habarlanady», - deıdi ol.
