«Qazatomónerkásip» kompanııasynyń basshysy Elbasyna kásiporynnyń jumysy týraly baıandady

ASTANA. QazAqparat - Memleket basshysy «Qazatomónerkásip» ulttyq atom kompanııasy» aktsıonerlik qoǵamy basqarmasynyń tóraǵasy Asqar Jumaǵalıevti qabyldady, dep habarlady búgin Aqordanyń baspasóz qyzmeti.

Kezdesýde Elbasyǵa «Qazatomónerkásip» ulttyq atom kompanııasy» aktsıonerlik qoǵamy jumysynyń nátıjeleri týraly esep berildi, sondaı-aq jalpy atom salasyn damytý barysy jóninde málimet usynyldy.

Nursultan Nazarbaev atomdy beıbit maqsatqa paıdalaný máselesine jáne atom elektr stansalary jumysyndaǵy jahandyq úrdisterge nazar aýdardy.

Sondaı-aq, A.Jumaǵalıev Qazaqstan Prezıdentine ótken jyl qorytyndysy boıynsha kásiporynnyń josparlanǵan barlyq óndiristik jáne qarjylyq kórsetkishterge qol jetkizgenin baıandady. Kompanııanyń naqty tabysy alǵash ret 108 mlrd teńgeden asqan.

Budan bólek, Memleket basshysyna kásiporyndy transformatsııalaý baǵdarlamasynyń iske asyrylý barysy týraly málimdeldi. Odan 16 mlrd teńgeden astam ekonomıkalyq paıda túsken.

Elbasy «Qazatomónerkásip» ulttyq atom kompanııasyn ártaraptandyrý jáne jańǵyrtý jónindegi jumystardy jalǵastyrý qajet ekenin aıtty.

Kezdesý qorytyndysy boıynsha Nursultan Nazarbaev birqatar tapsyrma berdi.