Qazatomónerkásip kásiporyndarynda robottar men drondardy paıdalanatyn bolady
ShYMKENT. QazAqparat - Shymkentte «Qazatomónerkásip» UAK» AQ-nyń basshylyǵy men IT bólimsheleri mamandarynyń qatysýymen Aqparattyq tehnologııalar jónindegi koordınatsııalyq keńestiń otyrysy ótti. Jıynda údemeli tehnologııalyq jańǵyrý boıynsha maqsattardy iske asyrý, naqty aıtqanda ýran óndirisine robottandyrý jáne tsıfrlyq tehnologııalardy engizý máseleleri talqylandy, dep habarlaıdy «QazAqparat» HAA tilshisi.
Basqosýda sóz sóılegen «Qazatomónerkásip» UAK» AQ-nyń Basqarma tóraǵasy Asqar Jumaǵalıev Elbasynyń bıylǵy Joldaýyndaǵy Qazaqstannyń jahandyq básekege qabilettiligin arttyrý tapsyrmasy sheńberinde qazirgi ýaqytta ulttyq atom kompanııasy big data, avtomatızatsııa, tsıfrlandyrý jáne robotızatsııa tehnologııalaryn ázirlep engizý boıynsha belsendi jumys atqarylyp jatqanyn ótti.
«Qazirdiń ózinde biz óndiris kezinde myńdaǵan túrli datchıkterden kelip túsetin aýqymdy aqparatty jınaqtap, óńdeý jumysyn jolǵa qoıdyq. Osy jınalǵan aqparatty taldaıtyn Josparlaýdyń biriktirilgen júıesi engizilip jatyr. Júıe óndiristi ońtaılandyrý máselelerin sheshe kele, keńeıtilgen saraptama jasaýǵa múmkindik beredi. Vig data tehnologııasynyń basymdylyǵy - oqıǵanyń aldyn alyp, barynsha tıimdi sheshimder qabyldaý múmkindigi bar», - dep málimdedi kompanııa basshysy. 
«Indýstrııa 4.0» iske asyrý úshin Qazatomónerkásip Tsıfrlyq kenish, ERP (kásiporyn qoryn josparlaý), Josparlaýdyń biriktirilgen júıesi, Jaǵdaıattyq ortalyq ispetti jobalar negizinde ýran óndirisiniń negizgi baǵyttaryn keshendi túrde avtomattandyrýdy kózdeıdi. Bul jobalar «Indýstrııa 4.0» jańa elementterin - robottandyrý, 3D baspa, quraldar ınterneti, tolyqtyrylǵan shynaıylyq jáne basqa da tehnologııalardy iske qosýǵa negiz bolmaq. 
Ótken jyly «Qazatomónerkásip-SaUran» kásiporyny «Tsıfrlyq kenish» jobasyn óndiriske engizgen bolatyn. Atalmysh aqparattyq júıe derekterdi jınap, óndiristik protsesti ońtaılandyryp, reagentterdiń jumsalýyn baqylap, qural-jabdyqtardyń bos turýyn qysqartyp, shtattan tys oqıǵalardy anyqtaýǵa jáne onyń aldyn alýǵa múmkindik beredi. 2025 jylǵa qaraı «Tsıfrlyq kenish» jobasynan kelip túsken ekonomıkalyq tıimdilik 12 mlrd teńge quraıdy dep kútilýde.
«Qazatomónerkásip-SaUran» kásiporynynda qazir daıyn ónimdi ydysqa salý jelisin robottandyrý protsessi júrgizilýde. Ýran ónimin ydysqa toltyrý, ólsheý jáne jóneltý jumystaryn buryńǵydaı jumysshylar emes, endi robottandyrylǵan keshen júrgizetin bolady», - deıdi «Qazatomónerkásip» UAK» AQ-nyń transformatsııa jáne kadrlyq saıasat jónindegi bas dırektory Rýslan Eńsebaev.
Búginde kompanııa kásiporyndaryndaǵy qural-jabdyqtarǵa ornatylǵan kóptegen datchıkter ınternet kómegimen barlyq óndiristik kórsetkishter ortalyqqa jóneltiledi. Bul shynaıy aqparat alyp, óndiristegi adamı faktorǵa táýelsiz avtonomdy protsesster atqarýǵa múmkindik beredi. Óndiristik ýchaskeler ózara tapsyrys berip, parametrlerdi túzetip, normatıvterdi retteı alady. Sonymen qatar, qazirgi kezde Qazatomónerkásip kásiporyndaryndary magıstraldy qubyrlardyń kúıin tekserý úshin dron kómegine júginedi. Jaqyn bolashaqta dron qondyrǵysy óndiristik nysandarǵa júk (dári-dármek, qural-saıman t.b.) jetkizedi dep josparlanýda. Jyldyń sońyna deıin óndiris oryndarynda qultemirler júıesi de engizilmekshi.
«Jaqyn arada biz kásiporynda robottar, drondar paıdalanatyn bolamyz. Solardyń arqasynda adam faktoryn azaıtamyz. Búkil júıelerdi baqylaýda ustaımyz. Qaýipsizdik jaǵynan da ol kóp múmkindik beredi», - dedi Asqar Jumaǵalıev.
