«Qazatomónerkásip-Demeý» kompanııasy «Jyl uıymy» atalymy boıynsha laýreat atandy
ALMATY. Qazannyń 28-i. QazAqparat /Ádilet Musahaev/ - Ulttyq atom kompanııasynyń enshiles kásiporny sanalatyn «Qazatomónerkásip-Demeý» mamandandyrylǵan kompanııasy keshe ótken «Altyn júrek» ulttyq qaıyrymdylyq syılyǵynyń «Jyl uıymy» atalymy boıynsha laýreaty atandy,
dep habarlaıdy QazAqparat.
Bul joly baıqaýǵa el aımaqtarynan 70 tapsyrys túsken. Syılyqtan úmitkerlerdiń arasynan sarapshylar keńesi on atalymnyń árqaısysy boıynsha úsh-úshten «myqtylaryn» iriktep aldy. Óıtkeni «Jyl uıymy» atalymynyń ıegerine aýqymdy qaıyrymdylyq jobalar men aktsııalardy ótkizgen, qaıyrymdylyq kómektiń jańadan tıimdi formalaryn engizgen jáne qoǵamdyq mańyzy zor is-sharalardyń bas demeýshisi bolǵan uıymdar men kompanııalar ǵana laıyq.
Sońǵy bes jyl kóleminde atalmysh kompanııa jalpy quny 14,2 mıllıard teńgeni quraıtyn 55-ten astam jobany júzege asyrdy. Atap aıtqanda, aýyldyq jerlerde balabaqshalar, mektepter, sport-saýyqtyrý jáne mádenı ortalyqtar, densaýlyq saqtaý mekemeleri salynyp, qaıta jańǵyrtyldy. Sondaı-aq aýlalardy kórkeıtý men kógaldandyrý jumystary da atqaryldy.
«Qazatomónerkásip-Demeý» JShS 2004 jyly «Qazatomónerkásip» UAK» AQ-nyń enshiles kásiporny retinde qurylǵan. Mamandandyrylǵan áleýmettik kompanııa ulttyq atom kompanııasynyń áleýmettik nysandardy basqarý men áleýmettik jobalardy júzege asyrýshy operatory bolyp tabylady. Negizgi qarjy kózi - Qazatomónerkásip pen onyń sheteldik áriptesteri qatysýymen qurylǵan jarǵylyq qor. «Qazatomónerkásip-Demeý» Qazaqstan azamattarynyń ál-aýqatyn arttyrýdy maqsat tutady. Al 2008 jyly bıznestiń áleýmettik jaýapkershiligi jónindegi ulttyq «Paryz» baıqaýynda «Jyldyń úzdik áleýmettik jobasy» atalymy boıynsha laýreat atanǵan.
