Qazatomónerkásip bıyl qansha kiris almaq

  ASTANA. QazAqparat - Aǵymdaǵy jyldyń qorytyndysynda «Qazatomónerkásip» ulttyq kompanııasy 46 mlrd teńge kiris alýdy josparlaýda. Bul týraly búgin Ortalyq kommýnıkatsııalar qyzmetindegi brıfıngte «Qazatomónerkásip» UAK» AQ-nyń basqarma tóraǵasy Ǵalymjan Pirmatov aıtty, dep habarlaıdy QazAqparat.

«Tolyqtaı alǵanda, 2017 jyldyń qorytyndysynda kompanııanyń operatsııalyq kirisi 46 mlrd teńge deńgeıinde bolady dep kútilýde», - dedi ol.

Kompanııa basshysynyń aıtýynsha,  qol qoıylǵan memorandýmdarǵa sáıkes sońǵy jyldary Ońtústik Qazaqstan jáne Qyzylorda oblystarynyń bıýdjetine 4,8 mlrd teńge aýdaryldy. Sondaı-aq, memorandým boıynsha Shyǵys Qazaqstan oblysynyń bıýdjetine aǵymdaǵy jyly 1 mlrd teńge berildi. Aldaǵy eki jylda taǵy 2 mlrd teńge bólinetin bolady. 

«Munan bólek, jer qoınaýyn paıdalaný kelisimsharttary aıasynda aımaqtardyń áleýmettik-ekonomıkalyq damýyna jyl saıyn 1 mlrd teńgeden astam qarjy bólinedi. Bıyl kompanııa Astanadaǵy 240 oryndyq balabaqsha qurylysyn aıaqtady, ol nysan da qalaǵa óteýsiz tabystalady», - dedi Ǵalymjan Pirimbetov.

Onyń sózine qaraǵanda, 2015 jyldan beri Qazatomónerkásipte Transformatsııa baǵdarlamasy iske asyrylýda. Onyń ekonomıkalyq tıimdiligi 2025 jylǵa qaraı 136 mlrd teńge quraıdy dep kútilýde.