Qazatomónerkásip birqatar kompanııalardaǵy aktsııalaryn satpaq
ASTANA. QazAqparat - «Qazatomónerkásip» UAK» AQ «Astana Solar» JShS, «Kazakhstan Solar Silicon» JShS jáne «KazSilicon» MK» JShS-nyń jarǵylyq kapıtalyndaǵy 75-100% qatysý úlesi paketin satatynyn habarlaıdy.
Konkýrstyq qujattama men ashyq eki kezeńdik konkýrstyń habarlamasy «Qazatomónerkásip» UAK» AQ-nyń (www.kazatomprom.kz) veb-portalynda ornalastyrylǵan. Osy kórsetilgen seriktestikterdiń jarǵylyq kapıtalyndaǵy 100% qatysý úlesi úshin suralatyn bastapqy baǵa on segiz mıllıard eki júz jetpis jeti mıllıon jıyrma toǵyz myń teńgeni quraıdy.
Konkýrs «Samuryq-Qazyna» AQ jáne daýys berý aktsııalarynyń elý paıyzdan astamy tikeleı nemese janama túrde «Samuryq-Qazyna» AQ-na menshik retinde tıesili bolǵan uıymdardyń «Samuryq-Qazyna» AQ Dırektorlar keńesiniń sheshimimen bekitilgen aktıvterin satý jáne qaıta qurylymdaýdyń biryńǵaı Erejeleri men «Qazatomónerkásip» UAK» AQ aktıvterin satý jónindegi Komıssııa bekitken konkýrstyq qujattamalarǵa sáıkes júrgiziledi.
Ashyq eki kezeńdik konkýrs 2018 jylǵy 12 naýryzda bastalyp, 28 naýryz kúni Astana ýaqytymen saǵat 15.00-de aıaqtalady.
Aktıvti satyp alǵan ınvestor mámileniń belgilengen sharttaryn oryndaý japýapkershiligin óz moınyna alady. Satyp alýshy qyzmetkerlerdiń shtattaǵy sanyn, qyzmet profılin saqtaýdy jáne kásiporyndardyń árekettegi sharttaryn oryndaýǵa mindettenedi.
«Astana Solar» JShS - jyldyq óndiristik qýaty 50 MVt-tan 100 MVt-qa deıin ulǵaıtý múmkindigine ıe fotoelektrli modýlder shyǵaratyn qazirgi zamanǵy zaýyt.
«Kazakhstan Solar Silicon» JShS - mýltıkrıstaldy kremnıı plastınalaryn (156h156 mm, r-úlgi) jáne jobalyq qýaty jylyna 60 MVt-qa ıe PQK 16%-dan kem emes fotoelektrli uıashyqtar óndiretin zaýyt.
«KazSilicon» MK» JShS - jobalyq qýaty jylyna 10 000 tonna ónim óndirýge jáne jobalyq qýaty jylyna 3 200 tonnalyq metallýrgııalyq kremnıı óndirisine ıe, qýattalǵan qory 1,74 mln tonna jelilik kvartsqa teń Sarykól ken orny.
Enshiles jáne táýeldi kásiporyndardy satý Bıznesti transformatsııalaý baǵdarlamasy aıasynda bıznesti ońtaılandyrý maqsatynda beıindi emes aktıvterden arylý jáne kompanııa qyzmetin tikeleı atom salasyna baǵyttaý jolymen júzege asyrylýda.
