Qazannyń aıaǵyna deıin halyqaralyq deńgeıdegi 3 kýrorttyq aımaqtyń júıeli damý jospary jasalady - Muhıt Saımasaev
ALMATY. 24 mamyr. QazAqparat - Týrızm tartymdylyǵynyń jınaqtalǵan tujyrymdamasy ázirlengen soń naqty ınvestorlardy tartý bastalady.
Ony QR Indýstrııa jáne jańa tehnologııalar mınıstrliginiń týrızm ındýstrııasy komıteti tóraǵasynyń orynbasary Muhıt Saımasaev búgin Almatyda ótken «Almaty qalasynda týrızmdi damytýdyń qazirgi jaǵdaıy men keleshegi» degen taqyryptaǵy alqaly jıynda málimdedi.
«Qarasha aıyna deıin týrızmdi júıeli damytý jospary jasalady. Uzaq merzimdik damý strategııasy anyqtalady. Syrtqy jáne ishki týrızm úshin Balqash, Alakól, Baıanaýyl, Aqsý-Jabaǵyly, Qarqaraly men Almaty sııaqty aımaqtardaǵy damýdyń negizgi núkteleri belgilenedi. Sondaı-aq ınvestorlarmen ózara árekettestiktiń saıasaty men memlekettik qoldaýdyń jańartylǵan tetikteri anyqtalady», - deıdi M.Saımasaev. Onyń aıtýynsha, qazannyń aıaǵyna deıin halyqaralyq deńgeıdegi 3 kýrorttyq aımaqtyń júıeli jospary jasalady. Olar - Almatynyń janyndaǵy taý-shańǵysy kýrorty, Býrabaı jáne Kendirli. Júıeli damý josparynyń qorytyndysy týrızmniń tartymdylyǵynyń jınaqtalǵan tujyrymdamasy ázirlenedi. Memlekettik-jeke seriktestik modeli boıynsha oǵan naqty ınvestorlardy tartý jumysy bastalady. Bul úsh joba boıynsha elge jyl saıyn 3 mıllıonnan astam týrıst tartýdyń áleýeti bar.
