Qazannyń 27-29 kúnderi Aqtaý qalasynda Ulttyq medıtsınalyq holdıng kúnderi ótedi

Bul týraly atalmysh Holdıngtiń baspasóz qyzmetinen málim etti.

Sharanyń maqsaty - densaýlyq saqtaý salasyndaǵy jergilikti mamandardyń biliktiligin arttyrý. Sonymen birge, bul kúnderi UMH mamandary Mańǵystaý oblysynyń turǵyndaryna medıtsınalyq kómekter de kórsetetin bolady.

Jumys tobynyń quramyna UMH-ǵa enshiles Ana men bala Ulttyq ǵylymı ortalyǵy, Respýblıkalyq balalardy saýyqtyrý ortalyǵy, Respýblıkalyq neırohırýrgııa ortalyǵy, Respýblıkalyq dıagnostıkalyq ortalyq jáne Respýblıkalyq jedel járdem ǵylymı ortalyǵynda jumys isteıtin hırýrg, travmatolog, ortoped, akýsher-gınekolog, pedıatr, allergolog jáne taǵy da basqa mamandar toptastyrylǵan.

Respýblıkalyq jedel járdem ǵylymı ortalyǵy dıagnostıka jáne rentgenohırýrgııa bóliminiń jetekshisi Sergeı Borovskıı joǵarǵy deńgeıdegi medıtsınalyq keńestermen qatar, mańǵystaýlyq medıtsına mamandaryna arnap sheberlik sabaqtar ótkizetin bolady. Sabaqtar kardıologııa, neırohırýrgııa, akýsherlik, gınekologııa, allergologııa, ımmýnologııa, nefrologııa, endokrınologııa, balalardy saýyqtyrý, dıagnostıka jáne taǵy basqa salalar boıynsha júrgiziledi.

UMH kúndergi barlyq is-sharalar, onyń ishinde ota jasaý sátteri on-laın rejiminde aýyldyq jerlerdegi medıtsınalyq uıymdarǵa taratylady.

Eske salaıyq,«Ulttyq medıtsınalyq holdıng» AQ QR Úkimetiniń 2008-jylǵy mamyrdyń 13-indegi Qaýlysymen halyqqa joǵary dárejedegi medıtsınalyq kómekter kórsetý maqsatynda quryldy. Búgingi tańda holdıng mamandary tek qana elimizde ǵana emes, álemde sırek ótkiziletin joǵary dárejedegi ota jasaýmen aınalysady. UMH zaman talabyna saı joǵary sapaly tehnologııalarmen jabdyqtalǵan.