Qazannyń sońǵy kúnderi kún jylynyp, keı óńirlerde qar jaýady
ASTANA.KAZINFORM — 29–31 qazan kúnderi Qazaqstannyń batysynda aýa temperatýrasy +22°S-qa deıin kóterilse, elimizdiń soltústigi men shyǵysynda jáne ońtústiktiń taýly aımaqtarynda qar jaýýy múmkin. Sınoptıkterdiń boljamynsha, túnde eldiń basym bóliginde aýa temperatýrasy 0°S-tan tómendeıdi.
«Qazgıdromet» RMQ sınoptıkteriniń boljamynsha, qazan aıynyń sońǵy kúnderi Qazaqstannyń batys bóliginiń turǵyndaryn jyly ári qolaıly aýa raıy qýantady. Bul óńirde aýa raıyn aýqymdy antıtsıklon qalyptastyrady. Al elimizdiń soltústigi men shyǵysynda, sondaı-aq ońtústik oblystardyń taýly aýdandarynda atmosferalyq fronttardyń áserinen jaýyn-shashyn (negizinen qar túrinde) kútiledi.
Túngi ýaqytta elimizdiń basym bóliginde aýa temperatýrasy 0°S-tan tómen bolady. Kúndiz eldiń soltústiginde, shyǵysynda jáne ortalyǵynda aýa temperatýrasy 0…+5°S-tan +5…+10°S-qa deıin qubylady. Al respýblıkanyń batysy men ońtústiginde aýa +17…+22°S-qa deıin jylynady.
Eske sala keteıik, búgin Qazaqstannyń 16 oblysynda, sondaı-aq Almaty men Shymkent qalalarynda aýa raıyna baılanysty eskertý jarııalandy.
