Qazanda Qazaqstandaǵy halyq sany 16 mln. 856,6 myń adamǵa jetti
ASTANA. 6 qarasha. QazAqparat - Aldyn ala esep málimetterine sáıkes Qazaqstan halqynyń sany 2012 jylǵy 1 qazanda 16 mln 856, 6 myń adamǵa jetken, jyl basynan beri bul kórsetkish 1,1 paıyzǵa ósti. Bul týraly Statıstıka agenttiginiń baspasóz qyzmetinen habarlandy.
Agenttiktiń málimetine qaraǵanda, Astana halqynyń sany 1 qazanda jyl basynan beri 27,5 myń adamǵa ósip, 770,4 myń adamǵa jetken. Bul rette elordadaǵy halyqtyń tabıǵı ósimi 11,8 myń adamdy quraıdy, al mıgratsııalyq ósimi 15,7 myń adamǵa jetken.
Almaty halqynyń sany qańtar-qyrkúıekte 16,4 myń adamǵa artyp, 1 mln. 466,8 myń adamǵa jetti. Almatydaǵy halyqtyń tabıǵı ósimi 11,3 myń adamdy qurasa, mıgratsııalyq ósimi 5,1 myń shamasynda bolǵan. Budan bólek, Soltústik Qazaqstan men Shyǵys Qazaqstan oblysynan basqa oblystardyń halqynyń sany qańtar-qyrkúıekte ósken. Eń joǵary kórsetkishke Ońtústik Qazaqstan oblysy ıe bolyp, atalǵan óńirdegi ósim 45,5 myń adamdy qurasa, halyq sany 2 mln 667,1 myń adamǵa jetti. Almaty oblysyndaǵy ósim - 28,8 myń, 1 mln 938,2 myń adam, Mańǵystaý oblysynda - 17,7 myń adam, 563,4 myń adam boldy.
