«Qazan» jáne «Qara kassa» oıyndary: SQO-da qylmystyq ister qozǵaldy
PETROPAVL. QazAqparat – Soltúsik Qazaqstan oblysynda polıtseıler «Qazan» jáne «Qara kassa» qarjy oıyndary boıynsha eki qylmystyq is qozǵap, tergeýdi bastady, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, Petropavl qalalyq polıtsııa basqarmasyna WhatsApp tobyna kirip, oıynǵa qosylý úshin 14 myń 300 teńgesin bergen áıelden aryz tústi. 60 jastaǵy turǵyn osylaısha qosymsha tabys tappaq bolǵan.
Esterińizge salaıyq, «Qazan», «Qara kassa» qarjy oıyndary Qazaqstanda aqpan aıynda messendjerlerde bastalǵan edi. Onyń talaby boıynsha, oıynǵa qatysý úshin 14 myń 300 teńge tólem jasap, ózimen birge eki adamdy tartý qajet. Olar da kassaǵa sonsha aqsha salýy tıis.
Aryzdanýshy áıeldiń aıtýynsha, chatqa shaqyrǵan toptyń ákimgeri qajetti qatysýshyny jınaǵannan keıin ózi shyǵyp ketken. Qalǵandary ýáde etilgen aqshany aqyrynda ala almaǵan.
Kókshetaý qalasynyń turǵyny da Petropavlda turatyn boıjetkenge senip qalǵan. Bul oqıǵa boıynsha da «Alaıaqtyq» deregi boıynsha sotqa deıingi tergeý bastaldy.
«Kúmándi kórinse, ári aqsha salý qajet bolsa, sol aqshańyzdy keıin kórmeýińiz múmkin ekenin túsinýińiz qajet. Ońaı jolmen aqsha tappaq bolǵandar alaıaqtardyń qurbanyna aınalýda. Tek aqshańyzdan aırylyp qoımaı, kúdiktilerdiń sanatyna da enýińiz múmkin. Polıtsııa qyzmetkerleri buǵan deıin aıtqandaı, bul eki oıynda qarjy pıramıdasynyń belgileri bar», - deıdi SQO Polıtsııa departamenti bastyǵynyń orynbasary Eńbek Sembın.
Mamandardyń aıtýynsha, mundaı qarjy oıyndarynda alǵashqylardyń biri bolyp tirkelgender ǵana paıda kóredi. Qalǵandary salǵan aqshalarynan aıyrylýlary múmkin. Alaıda, bul týraly qansha aıtylyp, eskertilgenimen qarjy pıramıdasyna tirkelip, ońaı aqsha tapqysy keletinderdiń sany azaımaı otyr.
Qarjy pıramıdasyn quryp, basqarǵandarǵa 10 jylǵa deıin bas bostandyǵynan aıyrý jáne dúnıe-múlkin tárkileý jazasy qarastyrylǵan.
