Qazan men qarasha ádettegiden jylyraq bolady — aýa raıy boljamy
ASTANA. KAZINFORM — Qazaqstanda qazan aıy ádettegiden jyly bolady. Qarashada aýa temperatýrasy qalypty kórsetkishten taǵy da joǵary bolýy múmkin. Ekologııa jáne tabıǵı resýrstar mınıstri Álibek Qýantyrov Úkimette aldaǵy aýa raıy boljamyn aıtty.
— Aýa raıy boljamyna sáıkes, qazan aıynda respýblıkanyń basym bóliginde aılyq aýa temperatýrasy normadan 1-2°S joǵarylaıdy. Al Shyǵys Qazaqstan oblysynda, Pavlodar oblysynyń soltústik-shyǵys jartysynda jáne Abaı oblysynda normaǵa jýyq bolady dep kútiledi, — dedi Ekologııa mınıstri.
Qazan aıynda jaýyn-shashyn mólsheri respýblıkanyń basym bóliginde normaǵa jýyq bolmaq. Eldiń qıyr batysy men soltústik-batysynda (Batys Qazaqstan oblysynda, Atyraý, Mańǵystaý oblystarynyń batysynda, Aqtóbe oblysynyń soltústiginde jáne Qostanaı oblysynyń soltústik-batysynda) normadan asady.
Al ońtústik pen ońtústik-shyǵystyń jazyq bóliginde, elimizdiń ortalyq oblystarynyń ońtústiginde jáne Abaı oblysynyń ońtústiginde normadan azyraq jaýyn-shashyn kútilip otyr.
— Qarasha aıy jyly bolady dep kútiledi. Respýblıkanyń basym bóliginde aýa temperatýrasy normadan 1-2°S joǵary bolady. Jaýyn-shashyn mólsheri respýblıkanyń basym bóliginde — Soltústik Qazaqstan oblysynda, sondaı-aq Pavlodar, Aqmola jáne Qostanaı oblystarynyń soltústik bólikterinde normadan joǵary bolady dep kútiledi, — dedi Á. Qýantyrov.
Tolyǵyraq boljamdardy Qazgıdromet aptasyna eki ret, dúısenbi jáne sársenbi kúnderi, Aýyl sharýashylyǵy mınıstrligine jáne Úkimet apparatyna usynady. Boljam bir aptaǵa, oblystar men kúnder boıynsha naqtylanyp beriledi.
Buǵan deıin Energetıka vıtse-mınıstri Qaıyrhan Tutqyshbaev elimizdiń qaı óńirlerinde jylytý maýsymy bastalatynyn aıtqan edi.
