Qazan-qarashada onnan astam adam sýǵa ketti
ASTANA. QazAqparat - Bıyl muz ústinde balalardyń zardap shekken faktileri bolǵan joq. Bul týraly búgin Ortalyq kommýnıkatsııalar qyzmetindegi baspasóz máslıhatynda QR ІІM Tótenshe jaǵdaılar komıtetiniń resmı ókili Rýslan Imanqulov málim etti.
«Qys mezgili bastalysymen taǵy da bir aıtarlyqtaı mańyzdy másele týyndaıdy, ıaǵnı ol muz ústindegi qaýipsizdik qaǵıdalaryn saqtamaýǵa qatysty. Abyroı bolǵanda, osy jyly muz ústinde balalardyń zardap shekken faktileri oryn alǵan joq. Ókinishke oraı eresek adamdar zardap shekti. Atap aıtqanda, qazan-qarasha aılarynda 13 oqıǵa tirkeldi jáne balyq aýlaý kezinde onnan astam adam sýǵa batyp ketti»,-dedi R. Imanqulov.
Mundaı faktiler Astana qalasynda, Qaraǵandy, Aqmola, Qostanaı, Qyzylorda, Atyraý oblystarynda oryn aldy.
Onyń sózine qaraǵanda, osyndaı qaıǵyly oqıǵalarǵa jol bermeý úshin TJ komıtetiniń qyzmetkerleri balalardy úıretý boıynsha profılaktıkalyq sharalar ótkizýde. Oqý oryndarynda ınteraktıvtik sabaqtar, qutqarý bólimshelerinde ekskýrsııalar men ashyq esik kúnderi, baıqaýlar, órt-qutqarý sporty boıynsha jarystar uıymdastyrylýda.
«Statıstıkalyq málimetterge súıensek, jyl basynan beri TJ departamentteriniń mamandary 500-ge jýyq ınteraktıvti sabaq ótkizilgen, oǵan 360 myńnan astam oqýshy qatysty boldy. Respýblıkamyzdaǵy 25 myńǵa jýyq oqýshy «Jas qutqarýshy» atty úıirmelerge qatysýda»,-dedi resmı ókil.
