Qazan qalasyndaǵy tsırkte pilder aıqasyp, kórermenderdiń záresin aldy

QAZAN. Tatar-ınform-QazAqparat – Tatarstan astanasynda tsırk qoıylymy kezinde eki pil kútpegen qylyq kórsetti, dep habarlaıdy QazAqparat «Tatar-ınform» agenttigine silteme jasap.

Saıttyń jazýynsha, tsırk kórermenderi qoıylymǵa shyqqan eki pildiń biri ekinshisin qalaı qaǵyp qulatqanyn vıdeoǵa túsirip alǵan.

«Osy oqıǵadan keıin kórermender oryndarynan asyǵys turyp, taraı bastady. Taǵy bir vıdeoda pilderdiń biri qalaı qulaǵany basqa qyrynan túsirilgen», - dep jazady jergilikti saıt.

Tsırk dırektory Ramıl Sharıfýllın «Tatar-ınform» aqparat agenttigine bergen málimetinde oqıǵanyń bolǵanyn rastady. Ol atalmysh keleńsizdik janýarlardyń kóktemgi qubylýynan bolýy múmkin degen boljam aıtyp otyr.

«Oqıǵa saldarynan tsırk ártisteri de, kórermender de zardap shekken joq. Pilder de aman-esen», - deıdi tsırk basshysy.