Qazan aıynda ónerkásip kásiporyndarynyń iskerlik belsendiligi birshama tómendegen - Statıstıka agenttigi
ASTANA. Qarashanyń 13-i. QazAqparat /Qanat Mámetqazyuly/ ‑ Júrgizilgen zerteýler boıynsha 2009 jylǵy qazan aıynda elimizdegi ónerkásip kásiporyndarynyń iskerlik belsendiligi onyń aldyndaǵy aımen salystyrǵanda birshama tómendegen.
Bul týraly QazAqparat QR Statıstıka agenttigine silteme jasap habarlaıdy.
«Respondentterdiń baǵalaýyna oraı aǵymdaǵy jylǵy qazan aıynda onyń aldyndaǵy aımen salystyrǵanda ótkizilgen ónimge qatysty suranysta eleýli ózgeris bolmaǵan, daıyn ónim qorlary birshama kóbeıgen. Sonymen birge, elimizdegi kásiporyn basshylarynyń kópshiligi jaqyn aradaǵy 2-3 aıda óndiris kólemderiniń túbegeıli ósýin kútpeıtindigin kórsetti. 2009 jylǵy qazanda zertteýge qatysqan ónerkásip kásiporyndarynyń iskerlik belsendiligin sıpattaıtyn kásipkerliktiń senimdilik ındeksi ótken aımen salystyrǵanda 4 paıyzdyq tarmaqqa kemip, 2 paıyzdy qurady (maýsymdyq faktor esebimen). Saýalnamaǵa qatysqan basshylardyń kópshiligi jaqyn aradaǵy 2-3 aıda óz kásiporyndarynyń iskerlik belsendiligine qatysty eleýli ózgeristerdi boljamaıtyndyǵyn aıtty. Sondaı-aq, zertteý kórsetkenindeı, aǵymdaǵy jylǵy qazan aıynda qyrkúıek aıymen salystyrǵanda taýar aınalymy jáne taýar qorlary deńgeıine qatysty eleýli ózgerister bolmaǵan. Esepti kezeńde zerttelgen kásiporyndardyń qarjylyq-ekonomıkalyq ahýalynyń turaqtalýy baıqaldy. Sonymen qatar, respondentter jaqyn aradaǵy 2-3 aıda osy kórsetkishterdiń túbegeıli jaqsarýyn boljamaıtyndyǵyn kórsetken», delingen baspasóz qyzmeti taratqan málimette.
Sonymen birge, saýalnamaǵa qatysqan elimizdegi kásiporyn basshylarynyń kópshiligi aldaǵy 2-3 aıda kásiporyndardyń iskerlik belsendiliginiń shamaly ósýi múmkin dep kórsetken.
