Qazan aıynda Medıtsınalyq saqtandyrý qoryna 8,7 mlrd teńge aýdaryldy

ASTANA. QazAqparat - 2018 jyldyń qazan aıynda Medıtsınalyq saqtandyrý qoryna 8,7 mlrd teńgeden astam jarna tústi. Bul týraly «Áleýmettik medıtsınalyq saqtandyrý qorynyń» baspasóz qyzmetine silteme jasap «QazAqparat»  habarlaıdy.

Málimetterge súıensek, júıe iske qosylǵan 2017 jyldyń 1 shildesinen bıylǵy 31 qazanǵa deıingi aralyqta jeke kásipkerler men jumys berýshiler tólegen jarnanyń jalpy somasy 113,8 mlrd teńgege jetti.

«Onyń 105,2 mlrd teńgesi (shamamen 92,4%) jumys berýshilerdiń aýdarymdary bolsa, qalǵan 8,6 mlrd teńge (7,6%) - jeke kásipkerler men azamattyq-quqyqtyq kelisimshart negizinde eńbek etetin tulǵalarǵa tıesili», - delingen baspasóz baıanynda.

Aımaqtyq turǵydan alǵanda, jarna tóleý jaǵynan burynǵysha Almaty, Astana qalalary men Qaraǵandy oblysy kósh bastap tur.

Esterińizge sala ketsek, jınaqtalǵan qarjy Ulttyq bankte saqtalady. Bolashaqta MÁMS paketi sheńberindegi qyzmetter aqysyn tóleýge jumsalady. Elimizdiń bas bankimen qarjyny senimgerlik basqarý týraly kelisim bekitilgen.