Qazan aıynda Qazaqstanda qansha kredıt berildi
Kredıt naryǵynda ekinshi deńgeıli bankterdiń ekonomıkany kredıtteýi kóbinese jeke tulǵalar kredıti esebinen ulǵaıyp, 21 481 mlrd teńge boldy. Kredıtterdiń negizgi úlesi ekinshi deńgeıli bankterden alynǵan. Jeke tulǵalardy kredıtteý 2,4% artty. Jeke tulǵalar arasynda tutynýshylyq nesıeler suranysqa ıe bolǵan – 7 302,1 mlrd teńge.
Sonymen birge qazanda baspana jaldaý aqysynyń aıtarlyqtaı kóterilýi jáne «7-20-25» baǵdarlamasynda qarajattyń belsendi ıgerilýi aıasynda ıpotekalyq kredıtteýdiń ósý qarqyny joǵarylap, 4 443,3 mlrd teńgege jetken.
Jyldyq mánde zańdy tulǵalardyń nesıe alýy artqan. Máselen, qyrkúıekte 9,1% bolsa, qazanda 11,4% qurady. Bul rette aqpandaǵy eń joǵarǵy kórsetkishpen (15,6%) salystyrǵanda jyldyq ósý qarqyny baıaýlaǵan.
Sonymen qatar aqpan-naýryzdaǵy eń joǵary kóterilýden keıin teńgeniń aıyrbastaý baǵamynyń nyǵaıýy valıýtalyq qaıta baǵalaý esebinen zańdy tulǵalardyń kredıttik portfeliniń statıstıkalyq tómendeýine ákeldi. Zańdy tulǵalardyń kredıttik portfeliniń aılyq ósýi 0,8% deıin baıaýlady.
Ulttyq valıýtadaǵy kredıtterdiń kólemi 19 723,7 mlrd teńgege deıin a/a 2% ulǵaıdy. Onyń ishinde zańdy tulǵalarǵa berilgen kredıtter 6 352,1 mlrd teńgege deıin 1,1%, jeke tulǵalarǵa berilgen kredıtter – 13 371,6 mlrd teńgege deıin 2,4% artqan. Shetel valıýtasyndaǵy kredıt kólemi 1 757,3 mlrd teńgege jetken.
Jeke tulǵalarǵa valıýtalyq qaryzdar 2022 jylǵy aqpannan 24,2% azaıdy. Shaǵyn kásipkerlik sýbektilerin kredıtteý qazanda 4 280,7 mlrd teńgege deıin 1,2% ulǵaıǵan.
Nátıjesinde teńgedegi kredıtterdiń úles salmaǵy 2022 jylǵy qazannyń sońynda 91,8% bolǵan (2021 jylǵy jeltoqsanda – 89,7%).
Sondaı-aq qazan aıynda uzaq merzimdi qaryzdarmen salystyrǵanda qysqa merzimdi kredıtterdiń artýy jalǵasty. Qysqa merzimdi kredıt berý 3%, uzaq merzimdi kredıtter 1,6% ulǵaıǵan.