Qazan aıynda elimizdegi jumyssyzdyq deńgeıi 6,4 paıyzdy qurady - Statıstıka agenttigi
ASTANA. Qarashanyń 13-i. QazAqparat /Qanat Mámetqazyuly/ ‑ Elimizde qazan aıyndaǵy jumyssyzdar sany 539,9 myń adamdy qurap, jumyssyzdyq deńgeıi 6,4 paıyzǵa teń boldy.
Bul týraly QazAqparat QR Statıstıka agenttigine silteme jasap habarlaıdy.
Agenttik málimetterine qaraǵanda, ótken qazan aıynda respýblıka ekonomıkasynda shamamen alǵanda 7,9 mln. adam jumys istegen. Bul ótken jyldyń dál osy kezeńimen salystyrǵanda jumyspen qamtylǵandardyń sany 58,6 myń adamǵa nemese 0,7 paıyzǵa kóbeıgenin kórsetedi. Sonymen birge, elimizdegi jaldamaly qyzmetkerlerdiń sany esepti kezeńde 5,3 mln. adamdy quraǵan. Bul kórsetkish jumyspen qamtylǵandardyń jalpy sanynyń 66,2 paıyzyna teń bolyp otyr.
«Qazaqstan Respýblıkasy Eńbek jáne halyqty áleýmettik qorǵaý mınıstrliginiń jumyspen qamtý organdarynda 2009 jylǵy qazannyń sońyna 85,5 myń adam resmı tirkelgen. Jumyssyzdar retinde tirkelgenderdiń úlesi ekonomıkalyq turǵydan belsendi halyqtyń 1 paıyzyn qurady. Bul ótken jylǵy uqsas kórsetkishpen salystyrǵanda 0,3 paıyzdyq tarmaqqa kóp.
