Qazan aıynda elimizdegi aýdandarǵa jyljymaly medıtsınalyq keshen jetkiziledi
«Koronavırýstyń taralý qaýpiniń aldyn alý úshin birqatar sharalardy qolǵa alamyz. Koronavırýstyń jańa tolqyny bola qalǵan jaǵdaıda elimiz boıynsha 70 000 oryn qarastyrýǵa daıynbyz, onyń 51 myńy statsıonarlarda Covid-19-ǵa arnalǵan oryndar. Dári-dármekpen qamtamasyz etýge qatysty birqatar sharalar qabyldandy. Covid-19-ǵa arnalǵan dári-dármekterdi 2 aıǵa artyǵymen alyp qoıdyq, ol aımaqtarǵa taratylyp qoıdy. Onyń quny 11,4 mıllıard teńge. Barlyq aımaqta eń qajetti degen dári-dármekter úshin 13 mıllıard teńge kóleminde turaqtandyrý qory quryldy. Ambýlatorııalyq deńgeıdegi dári-dármekter tizimi ulǵaıdy. Covid-19-ǵa arnalǵan taǵy 5 dári qosyldy», - deıdi QR Densaýlyq saqtaý mınıstri Alekseı Tsoı.
Onyń aıtýynsha, koronavırýsty úıde emdeý úshin 1 mıllıon naýqasqa arnalǵan tegin dári-dármek qarastyrylǵan.
«Sondaı-aq, 2,2 mıllıon teńgege tumaýǵa qarsy vaktsına satyp alyndy. Vaktsına egý 15 qyrkúıekten bastaldy. Qazirgi ýaqytqa deıin 1 mıllıonǵa jýyq adamǵa ekpe jasaldy. Infektsııalyq jáne provızorlyq statsıonarlarda 3379 ókpeni jasandy jeldetetin apparat bar. Qosymsha 2 619 dana osyndaı apparat satyp alynady, onyń ishinde 1 500 apparat otandyq ónim. 21 myń oryn ottegimen qamtamasyz etildi, qazan aıynyń sońyna deıin qosymsha 9 000-nan astam oryn ottegimen qamtamasyz etiledi. Aýdandyq aýrýhanalarǵa elimizde shyǵarylǵan qosymsha 53 rentgen apparaty alynady. Jedel járdem qyzmeti 1 167 dana sanıtarlyq avtokólikpen qamtamasyz etiledi. Aýyldaǵy halyqtyń medıtsınalyq qyzmetke qoljetimdiligi 100-ge jýyq jyljymaly medıtsınalyq keshendi satyp alýmen júzege asyrylady. Ol aýdandarǵa qazan aıynyń ortasyna deıin jetkiziledi», - deıdi ol.