Qazan aıynda Astanada «Qazavtojol-2010» VII halyqaralyq mamandandyrylǵan kórme ótedi
ASTANA. Tamyzdyń 18-i. QazAqparat - Aǵymdaǵy jylǵy qazannyń 27-29 aralyǵynda Astana qalasynda QR Kólik jáne kommýnıkatsııa mınıstrliginiń resmı qoldaýymen «Qazavtojol-2010». «Jol keshenindegi qural-jabdyqtar, qurylys jáne servıstik ındýstrııa» atty VII halyqaralyq mamandandyrylǵan kórme ótedi.
Kórmeni «Fair Expo» kórme kompanııasy uıymdastyrady. Onyń seriktesteri bolyp - «Qazaqstannyń avtojolshylar qaýymdastyǵy» Zańdy tulǵalar birlestigi (Astana qalasy), TMD Úkimetaralyq jolshylar keńesi, Merkator Holdıng (Reseı) jáne Kórme-marketıngilik ortalyǵy (Reseı) tabylady.
Kórme barysynda «Jol qurylysyna qajetti qazirgi zamanǵy qural-jabdyqtar, tehnıka jáne materıaldar» atty konferentsııasy men tehnıkalyq ekskýrsııalar ótkiziledi. Onyń bólimderi - jol-qurylysy jáne jer qazatyn arnaıy tehnıkalar; avtomobıl joldaryn, kópirlerdi jáne jol ótkelderin salý, qaıta jańartý, jóndeý jáne kútip ustaýǵa qajetti tehnologııalar men materıaldar; jol qozǵalysynyń qaýipsizdigin qamtamasyz etetin tehnıkalyq jabdyqtar (jol belgileri, baǵdarshamdar); jol jáne kópir qorshaýlary sııaqty jol qurylysyna qatysty basqa da máselelerdi qamtymaq.
Anyqtamalyq: «QazAvtoJol-2010» kórmesi - avtomobıl joldaryn, kópirlerdi jáne týnnelderdi jobalaý jáne salý, avtomobıl joldaryn paıdalaný jáne kútip ustaý salasy, mashına qurylysy jáne basqa uqsas salalardaǵy jetistikterdiń baıqaýy. Ekspozıtsııalarda jáne kórmeniń ǵylymı-iskerlik baǵdarlamasynyń is-sharalarynda jol qurylysy jáne avtomobıl joldaryn paıdalaný, jol mashınalary men qural-jabdyqtaryn shyǵarý, jol qozǵalysynyń qaýipsizdigin qamtamasyz etý salasynda jumys jasaıtyn Qazaqstannyń, Reseıdiń, taıaý jáne alys shetelderdiń jetekshi kásiporyndary, ǵylymı-zertteý jáne jobalaý ınstıtýttary, joǵarǵy oqý oryndary tanystyrylatyn bolady.
