Qazan aıynda 590 mln-nan astam jelilik shabýyldar tirkelgen

NUR-SULTAN. QazAqparat - «Memlekettik tehnıkalyq qyzmet» AQ (budan ári-«MTQ» AQ) súıemeldeıtin ınternetke qol jetkizýdiń biryńǵaı shlıýzi arqyly bıylǵy qazan aıynda 590 mıllıonnan astam jelilik shabýyldar tirkeldi jáne buǵattaldy, dep habarlaıdy QazAqparat «Memlekettik tehnıkalyq qyzmet» AQ baspasóz qyzmetine silteme jasap.

Osynyń nátıjesinde memlekettik jáne kvazımemlettik sektorlardyń aqparattyq-kommýnıkatsııalyq ınfraqurylymyna zııandy áser etý áreketterine jol berilmedi.

Elektrondyq poshtanyń biryńǵaı shlıýzi (EPBSh) arqyly memlekettik sektordyń elektrondyq mekenjaılaryna baǵyttalǵan 32 352 spam-jiberilimder buǵattaldy, sondaı-aq zııandy 1 722 habarlama buǵattalyp, karantınge jiberildi jáne maqsatty paıdalanýshylarǵa jetkizilgen joq.

«MTQ» AQ Kompıýterlik ıntsıdentterge áreket etý qyzmeti aǵymdaǵy jyldyń qazan aıynda 1744 aqparattyq qaýipsizdik ıntsıdentin aıqyndaǵan. 2019 jyldyń uqsas kezeńimen salystyrǵanda fıshıngtik shabýyldardyń sany 91% artqanyn atap kórsetý qajet.

«MTQ» AQ Kompıýterlik ıntsıdentterge áreket etý qyzmetiniń sarapshylary pandemııanyń saldary alaıaqtyq resýrstar sanynyń ulǵaıýyna áser etkenine nazar aýdarýda. Osyǵan baılanysty derbes derekterdiń qaýipsizdigin qamtamasyz etý úshin negizgi kıbergıgıena qaǵıdalaryn ustanyp, ártúrli, ásirese derbes derekterdi engizýdi qajet etetin habarlamalardy alǵan kezde muqııat bolý usynylady.

Esterińizge salaıyq, eger Siz aqparattyq qaýipsizdik ıntsıdentiniń qurbany bolsańyz, bizdiń mamandarǵa 1400 (táýlik boıy) aqysyz nómiri arqyly habarlaýǵa nemese https://www.cert.gov.kz/notify-incident siltemesi boıynsha ótinim, ne [e-mail] e-mail-ge hat jiberýge bolady.