Qazan aıy boıy elimizdiń birqatar shaǵyn qalalarynda otandyq jańa fılmder kórsetilmek
ASTANA. 11 qazan. QazAqparat - Mádenıet salasyndaǵy áleýmettik mándi isterdiń biri bolyp otyrǵan «Otanym - baqyt mekenim» atty jobaǵa Qazaqstan kınematografıster odaǵy da óz úlesin qosyp otyr, dep habarlady QR Mádenıet jáne aqparat mınıstrliginiń baspasóz qyzmeti.
Mádenıet jáne aqparat mınıstrligi tarapynan shyǵarmashylyq odaqtarǵa kórsetiletin qoldaýdyń sheńberinde Qazaqstan kınematografıster odaǵy birqatar otandyq jańa fılmderdi elimizdiń kishi qalalar kórermenderiniń nazaryna jetkizý sharasyn qolǵa aldy.
Atap aıtqanda, 2012 jyldyń 6 qazanynda Shyǵys Qazaqstan oblysynyń Zyrıanov qalasynda rejısser Ermek Tursynovtyń «Shal» atty fılmi kórsetildi. Arnaıy ázirlengen kınobaǵdarlamaǵa taǵy bir kórkemsýretti «Jaýjúrek myń bala» (rejısseri A.Sataev) fılmi jáne qazaqtyń kórnekti tulǵalaryna arnalǵan derekti «Qamal Smaıylov», «Ábdijámil Nurpeıisov» fılmderi kirgen. Fılmderdi kórsetý barysynda shyǵarmashylyq tulǵalardan turatyn delegatsııa kórermen qaýymmen júzdesedi.
Kınogerler delegatsııasynyń quramynda atalǵan derekti fılmderdiń avtorlary-rejısserleri Oral Júnisov, Jańabek Zaýyrbekovter; kınooperator Nıkolaı Raısov, sýretshi Vıktor Pýzyrnıkovter bar. Delegatsııanyń basshysy - Qazaqstan kınematografıster odaǵynyń tóraǵasy, Qazaqstannyń eńbek sińirgen qaıratkeri, kınooperator jáne kınorejısser Igor Aleksandrovıch Vovnıanko.
Qazaqstan kınematografısteriniń bul izgilik sharasy qazan aıynyń sońyna deıin respýblıkanyń basqa óńirlerindegi kishi qalalarynda jalǵasyn tabady.
Jospar boıynsha otandyq kınogerler óz fılmderimen Pavlodar oblysynyń Ekibastuz, Qaraǵandy oblysynyń Jezqazǵan (17 qazan), Jambyl oblysynyń Qarataý (26 qazan) qalalarynda ótkizýdi kózdep otyr.
