Qazan aıynda kólik zańnamasyn buzýdyń 643 faktisi anyqtaldy
ASTANA. KAZINFORM — Kólik mınıstrligi Premer-mınıstrdiń birinshi orynbasary Nurlybek Nálibaevtyń tapsyrmasyna sáıkes kóliktik baqylaý jumystaryn kúsheıtkenin málim etti.
Negizgi maqsat – jol qozǵalysy qaýipsizdigin qamtamasyz etý, avtomobıl joldaryn saqtaý jáne kólik zańnamasy talaptarynyń oryndalýyn baqylaý.
2026 jylǵy 1–27 qazan aralyǵynda Abaı, Aqtóbe, Soltústik Qazaqstan, Qyzylorda, Túrkistan jáne Ulytaý oblystarynda, sondaı-aq Astana qalasynda kóliktik baqylaýy boıynsha is-sharalar ótkizildi.
Nátıjesinde 643 ákimshilik quqyq buzýshylyq anyqtaldy. Olardyń qatarynda ruqsat etilgen salmaq jáne gabarıt talaptaryn buzý, júkterdi tasymaldaý qaǵıdalaryn saqtamaý, júrgizýshilerdiń eńbek jáne demalys rejımin buzý, sondaı-aq kólik zańnamasynyń basqa da talaptaryn oryndamaý faktileri bar.
Ruqsat etilgen salmaqtan artyq júk tasymaldaý faktilerin anyqtaýǵa jáne jolyn kesýge erekshe nazar aýdarylady. Mundaı zań buzýshylyqtar jol jabynynyń merziminen buryn tozýyna jáne avtomobıl joldarynyń búlinýine ákeledi. Sonymen qatar jol qozǵalysyna qatysýshylardyń qaýipsizdigine qater tóndirýi múmkin.
Kóliktik baqylaýdyń negizgi maqsaty – quqyq buzýshylyqtardyń aldyn alý, azamattardyń qaýipsizdigin qamtamasyz etý jáne jol ınfraqurylymyn saqtaý.
Kólik mınıstrligi tasymaldaýshylar men tasymaldaý protsesine qatysýshylardy belgilengen talaptardy qatań saqtaýǵa shaqyrady.
Kóliktik baqylaý jumystaryn kúsheıtý «Zań jáne tártip» qaǵıdaty aıasynda júıeli túrde jalǵasady.
Aıta keteıik, Qazaqstan men China Transinfo Group pılotsyz kólikti damytý jóninde memorandýmǵa qol qoıdy.
