Qazan aıynda eldegi ushaqtarda ınternet taratylady
ASTANA. KAZINFORM – Qazan aıynda Air Astana ushaqtarynyń bortynda ınternet iske qosylady. Bul týraly Jasandy ıntellekt jáne tsıfrlyq damý mınıstrligi Telekommýnıkatsııalar komıteti tóraǵasy Damır Seısembekov aıtty.
Onyń sózine qaraǵanda, ushaq bortynda Wi-Fi jelisin iske qosý úshin qajetti zańnamalyq ózgerister qabyldanyp qoıǵan.
- Bul baǵytta Air Astana kompanııasymen belsendi jumys istep jatyrmyz. Internet júıesimen jabdyqtalǵan alǵashqy ushaqtar qazan aıynda paıda bolady dep josparlanǵan. Jumys eki baǵytta júrgizilýde: biri — Viasat-pen, ekinshisi — OneWeb-pen, — dedi Damır Seısembekov Úkimette ótken baspasóz máslıhatynda.
Sonymen qatar ol ınternet qunyna qatysty másele áýe kompanııasynyń quzyretine jatatynyn málim etti.
- Tólem máselesin Air Astana kompanııasy qosymsha túsindiredi. Olardyń málimdemelerine súıensek, kompanııada túrli bonýstyq júıeler qarastyrylǵan, — dedi komıtet basshysy.
Buǵan deıin bıyl qazaqstandyqtar ushaq bortynda ınternetti paıdalana bastaıtynyn jazǵan edi.
