Qazan aıynda Astana men Almaty qalasynda baspana kóp satyldy — statbıýro
ASTANA. KAZINFORM — Qazan aıynda turǵyn úıdi satyp alý-satý boıynsha 41 259 mámile tirkelgen, onyń ishinde jeke úıler boıynsha — 8 717 jáne kóppáterli úılerdegi páterler boıynsha — 32 542 mámile jasaldy. Bul týraly Ulttyq statıstıka bıýrosy málim etti.
Byltyrǵy jyldyń qyrkúıek aıymen salystyrǵanda (41 313) turǵyn úıdi satyp alý-satý mámileleriniń sany 0,1%-ǵa azaıǵan.
— Mámileler sany boıynsha Astana (8 945 — 21,7%) jáne Almaty (7 868 — 19,1%) qalalary, sonymen qatar, Qaraǵandy oblysy (2 982 — 7,2%) kósh bastap tur. Mámileler sany Ulytaý oblysynda eń az — 327 mámile (0,8%), — delingen habarlamada.
Byltyrǵy jylmen salystyrǵanda qazanda mámileler sanynyń eń kóp ósimi Qostanaı oblysynda (+15,8%), Shymkent qalasynda (+7,7%) jáne Almaty oblysynda (+7,4%) baıqaldy. Al bir aıda Qyzylorda oblysynda (-28,4%), Almaty qalasynda (-11,2%) jáne Aqtóbe oblysynda (-5,2%) baspana az satylǵan.
Kóppáterli úılerdegi turǵyn úı mámileler sany bir aıda 0,3%-ǵa (110 mámilege) azaıǵan. 2025 jyldyń qazan aıynda páterler boıynsha barlyǵy 32 542 mámile jasaldy, bul mámilelerdiń jalpy sanynyń 78,9%-y. Kóppáterli úılerdegi turǵyn úı saýdasynyń negizgi úlesi Astana (27%), Almaty (22,2%) qalalaryna jáne Qaraǵandy oblysyna (7,8%) tıesili. Bólmeler sany boıynsha 2 bólmeli páterler satylymy basym boldy, 2025 jyldyń qazan aıynda olar boıynsha 12 399 mámile resimdelgen.
2025 jyldyń qyrkúıek aıymen salystyrǵanda qazanda jeke turǵyn úıler boıynsha mámileler sany 0,6%-ǵa (56 mámilege) ósti. Qazanda barlyǵy 8 717 mámile tirkelgen. Jeke turǵyn úıler boıynsha mámileler sanynyń eń kóp ósimi Qostanaı (+18,4%), Shyǵys Qazaqstan (+16,5%) jáne Batys Qazaqstan (+11%) oblystarynda baıqaldy. Al bir aıdaǵy eń kóp tómendeý Ulytaý (-15,9%), Qyzylorda (-10,7%) jáne Qaraǵandy (-8,3%) oblystaryna tán ekeni belgili bolyp otyr.
Byltyrǵy tıisti aıymen salystyrǵanda mámile sany 5,4%-ǵa ósken (2024 j. Qazan — 39 143). Mámileler sanynyń eń joǵarǵy ósimi Astana qalasynda (27,9%) baıqaldy, eń úlken tómendeý — Ulytaý oblysynda (-38%). 2025 jyldyń qańtar-qazan aılaryndaǵy mámileler sanyn 2024 jylǵy qańtar-qazan aılaryndaǵy mámileler sanymen salystyrǵanda 3,5%-ǵa ósken.
Aıta keteıik, elde turǵyn úı alý erejelerine ózgerister engizildi.