Qazan artta qaldy, alda - Almaty
ORAL. 31 qańtar. QazAqparat /Eljan Eraly/ - Qazan qalasynda aıaqtalǵan dopty hokkeıden álem chempıonatynda qazaqstandyqtar tórtinshi oryndy ıelendi.
Qazaqstan quramasy keshe qola júlde úshin básekede burynǵy álem chempıony Shvetsııa quramasyna 3:14 esebimen utyldy. Fınalda reseılikter fınderdi 6:1 esebimen tize búktirip, eki jyl ótken soń chempıondyq ataqty qaıtaryp aldy.
Qazaqstan quramasy sapynda Oraldyń «Aqjaıyq» hokkeıshileri de óner kórsetti. Endi osy «Aqjaıyq» oıynshylarynan quralǵan Qazaqstan quramasy Almatydaǵy «Medeý» muz aıdynynda Azııa oıyndarynyń altyn júldesin sarapqa salady. Alekseı Nıkıshov bastaǵan bapkerler jattyqtyratyn Qazaqstan quramasynyń bul synda jeńip shyǵatyny kúmánsiz.
