Qazalynyń ónimderi Reseı men Aqtóbe oblysyna eksporttalatyn boldy
QYZYLORDA. QazAqparat - Qazaly aýdanynyń ákimi Najmadın Shamuratov aýylsharýashylyǵy taýar óndirýshileriniń baqsha ónimderin syrtqy eksportqa ótkizý maqsatynda Máskeý qalasyna issaparmen bardy. Bul týraly QazAqparat tilshisi aýdandyq ákimdikke silteme jasap habarlady.
Іssapar barysynda Qazaly aýdany ákimdigi men Qazaqstandyq taýarlardy kóterme saýda ortalyǵynda ótkizetin «Kaz-Food» kompanııasynyń bas dırektory A.Rapıev arasynda memorandýmǵa qol qoıyldy. Sonymen birge «Skaılend-94» jabyq aktsıonerlik qoǵamynyń bas dırektory B.Garaevpen de qazalylyq ónimderdi ótkizý jóninde kelisimge keldi.
Qazaly aýdanynyń ákimi Najmadın Shamuratov Aqtóbe qalasyna issaparmen bardy. Óńirler arasyndaǵy yntymaqtastyqty damytýǵa arnalǵan forýmda aqtóbelik aýdan ákimderi men kásipkerler Qazaly ónimderin satyp alýǵa nıetti ekendikterin jetkizdi. Sondaı-aq, óz ónimderin de Qazaly aýdanynyń satylymyna qoıý jóninde usynystaryn aıtty. Jıyn sońynda Aqtóbe oblysynyń 8 aýdanynyń ákimi men Qazaly aýdany ákiminiń arasynda áriptestik memorandýmǵa qol qoıyldy.
Budan bólek, Aqtóbe qalasynda uıymdastyrylǵan Qazaly aýdany ónimderiniń kórmesinde «RZA» AQ-nyń sút, et ónimderi, «Syr marjany», «Eshojaev» JShS-niń kúrish ónimderi, «Beıimbet» kooperatıviniń konservilengen jemis-jıdek ónimderi aqtóbelikter nazaryna usynyldy.
Aıta keteıik, qazirgi tańda qala, kent, aýyldyq okrýgterde baý-baqsha, kókónis ónimderimen aınalysatyn kooperatıvter qurylýda. Aýdan basshylyǵy tarapynan bul kooperatıvterge baqshalyq jerdi qorshaý, jerdi óńdeý, aıaq sý jetkizý jumystaryna qoldaý kórsetiletin bolady.
Al jańadan qurylatyn aýylsharýashylyǵy salasy óndiristik kooperatıvi osy kásipkerlerden baý-baqsha ónimderin tıimdi baǵada satyp alyp, Reseı Federatsııasy men Aqtóbe oblysyna eksporttaıtyn bolady. Bul rette baý-baqsha ónimderin sharýashylyq negizde egý maqsatynda aýdan turǵyndaryna túsindirme jumystary júrgizilýde.
