Qazalynyń baý-baqsha ónimderi Reseıge eksporttalýda
QYZYLORDA.QazAqparat-Qyzylorda oblysynyń Qazaly aýdany aq kúrishtiń ordasy atanýymen birge «Syr qaýyny» degen brendimen de alys jáne jaqyn shet elderge ataǵy jaıylǵan ólke. 70 jyl buryn Belgııanyń astanasy - Brıýsseldegi halyqaralyq kórmede Qazalynyń qara kúlábisi altyn medal ıemdengen bolatyn. Bul týraly QazAqparat tilshisi habarlady.
Bıyl aýdan ákiminiń qoldaýymen aýyldyq okrýgterde baý-baqsha egý jumystaryn jandandyrý isi qyzý qolǵa alyndy. Jyl kóleminde ónimdi egýden bastap tutynýshyǵa jetkizýge deıingi aralyqtaǵy barlyq jumystar úılestirildi.
Aýdanda óndirilgen aýyl sharýashylyǵy ónimderin ótkizý máselesi oılastyrylǵan. Baqsha ónimderin syrtqy eksportqa ótkizý maqsatynda aýdan ákimi bastaǵan arnaıy delegatsııa ótken jyly Reseı Federatsııasynyń Máskeý qalasynda jáne Aqtóbe qalasynda issaparda bolyp, Qazaly aýdanynyń ákimdigi men reseılik «Kaz-Food» kompanııasymen jáne «Skaılend-94» jabyq aktsıonerlik qoǵamymen, Aqtóbe oblysynyń aýdan ákimderimen jergilikti ónimderdi ótkizý jóninde memorandýmdarǵa qol qoıdy.
Nátıjesinde eginmen aınalysatyn 9 kooperatıv jyl basynan beri 511 gektar jerden 7300 tonna ónim alǵan. Osy baý-baqsha ónimderiniń 30 tonnasy búgin Qazaly aýdanynan Reseı Federatsııasynyń Orsk qalasyna jóneltildi.
Onyń 22 tonnasy «Samuryq» jáne «Maıdakól» kooperatıvterine tıesili. «Samuryq» kooperatıvi bıyl Aqjona aýyldyq okrýgine qarasty Jalpaq eldi mekeninen 6 ga jerge qaýyn-qarbyz ekse, «Maıdakól» kooperatıvine 23 adam birigip, 60 gektarǵa baqsha ónimderin ekken.
Qalǵan 8 tonna qaýyn túrleri «AgroOptServıs» JShS dırektory Bekbolat Bıbalaevtiki. Jeke kásipker bıyl ındýstrııaldyq aımaqtan ónim saqtaý qoımasyn salý jobasyn júzege asyrmaq.
Jalpy, osy ýaqytqa deıin Qazaly aýdanynan 190 tonna baý-baqsha ónimderi eksportqa shyǵarylǵan. Qazaly ónimderi Reseı Federatsııasynyń Máskeý, Orsk qalalarynan ózge Aqtóbe, Aqtaý, Atyraý men Aral, Baıqońyr, Túrkistan, Jezqazǵan qalalary men aýdandaryna da jóneltilýde.
Sonymen qatar, halyqty jergilikti baý-baqsha ónimderimen qamtamasyz etý maqsatynda aýdan ortalyǵy Áıteke bı kentinen baý-baqsha ónimderi satylatyn bes oryn belgilenip, shatyrlar ornalastyryldy. Endi kent turǵyndary ózderi turatyn aımaqtarda jergilikti baqsha ónimderin tıimdi baǵaǵa satyp ala alady.
Jergilikti sharýalardyń ónimderin nasıhattaý maqsatynda Qyzylorda men Astana qalalarynda jáne aýdan ortalyǵynda aýylsharýashylyǵy ónimderiniń jármeńkeleri uıymdastyrylýda. Onda qazalylyq jergilikti ónimder halyqqa naryqtan tómen baǵada usynylyp keledi.
Aıta keteıik, Qazaly aýdany boıynsha 324 múshe birigip qurylǵan 36 aýyl sharýashylyǵy kooperatıvterine jerdi qorshaý, jerdi óńdeý, aıaq sý jetkizý jumystaryna qoldaý kórsetildi. Olardyń 25-i mal sharýashylyǵymen, 9-y egin sharýashylyǵymen, 1-i mal sharýashylyǵy ónimderin, 1-i kókónis ónimderin óńdeýmen aınalysady. Aýdanda óndirilgen ónimderdi tıisti oryndarǵa jiberýmen aınalysatyn «Baqsha» kooperatıvi jumys isteıdi. Baqshalyq jerlerdi qorshaý jumystaryna qajetti materıaldar satyp alýǵa bıýdjetten 18,0 mln teńge bólindi. Mashına-traktor parki 18 dana tehnıkamen tolyqty. 60,0 mln teńgege 6 MTZ traktor, 6 tirkeme, 3 soqa jáne 3 dán sepkish tehnıkalary satyp alynyp, Alǵa, Arandy, Maıdakól, Bozkól, Sarykól, Órkendeý aýyldyq okrýgteriniń sharýalaryna jańa tehnıkalardyń kiltteri tabystaldy.
