Qazalylyq dıqan tamshylatyp sýarý ádisimen mol ónim aldy
QYZYLORDA. QazAqparat - Qyzylorda oblysy Qazaly aýdanynda jergilikti dıqan tamshylatyp sýarý ádisimen mol ónimge negiz qalady, dep habarlaıdy QazAqparat tilshisi.
Jergilikti dıqan Nurlybek Nurqojaev tamshylatyp sýarý ádisimen 3,5 gektar jerge qarbyz ekti. Alǵashqy ónim shilde aıynyń basynda tutynýshylarǵa jol tartty. Jáne ony turǵyndarǵa qoljetimdi baǵada satyp otyr.
«Bıyl óńirde sý tapshylyǵy máselesi erekshe sezilip otyr. Oblys basshylyǵy tarapynan sý únemdeletin daqyldardy egýge mańyz berildi. Sondyqtan tamshylatyp sýarý ádisine kóńil bóldim. Qarbyzdyń 55 kúnde pisetin «Bombıks F1» deıtin sortyn ektim. Sýdy únemdep qana qoımaı, tyńaıtqyshty da arnaıy tútik boıymen jiberemiz», - dedi N. Nurqojaev.
Tamshylatyp sýarýǵa qajetti qural-jabdyqtarǵa 3,7 mln teńge jumsalǵan. Onyń 2 mln teńgesine «Bıznestiń jol kartasy 2020-2025» memlekettik baǵdarlamasy arqyly qol jetkizgen. Baǵdarlama aıasynda óziniń ınnovatsııalyq ıdeıasyn qorǵap, 2 mln teńge grant utyp alǵan.
Erte pisken qarbyzdy aýdan turǵyndarymen qatar, kórshiles Aral jáne Qarmaqshy aýdandarynan da kelip, satyp alýda. Qarbyzdyń «Bombıks F1» dep atalatyn sorty búgingi tańda ekinshi ret ónim berip jatyr. Odan bólek, jaqynda «Prodıýser» dep atalatyn sorty pisedi. Al 1 gektar jerge asqabaq pen qııar da ekken.
«Qazaly aýdanynda topyraqtyń sor bolýyna baılanysty baqsha egetin shaǵyn sharýalarǵa jer tegisteıtin tehnıka aýadaı qajet. Sebebi baqshadan mol ónim alý úshin mindetti túrde jer tegis bolyp, sýmen birneshe qaıtara shaıyp alý mańyzdy», - deıdi N. Nurqojaev.
Dıqannyń jumysymen tanysqan Qazaly aýdanynyń ákimi Muhtar Orazbaev qolynan is keletin azamattardy árdaıym qoldaıtynyn aıtty.
Eske sala ketsek, buǵan deıin Aral aýdany sharýalaryna jem-shóptiń jetkizile bastaǵandyǵyn habarlaǵan bolatynbyz.
