Qazalydaǵy aýylǵa ortaǵasyrlyq Jankent qalasynyń ataýy beriledi
QAZALY. QazAqparat - Qazaly aýdanyna qarasty Órkendeý aýylyna ortaǵasyrlyq Jankent qalasynyń aty beriledi, dep habarlaıdy QazAqparat tilshisi.
Órkendeý aýyldyq okrýginiń ákimi Nábı Úrgenishbaıdyń aıtýynsha, Qyzylorda oblystyq máslıhatynyń kezekti sessııasynda depýtattar Qazaly aýdanyndaǵy Órkendeý aýylyn Jankent ataýyna ózgertý jónindegi usynysty maquldaǵan. Búgingi tańda bul qujat oblystyq ádilet departamentine tirkeýge joldanǵan. Endi Jankent atynyń ortamyzǵa oralatyn sáti qashyq emes.
Jankent - Syr boıyndaǵy ortaǵasyrlyq qala. HІ-HІІ ǵasyrlarda Oǵyz memleketiniń astanasy bolǵan shahardyń orny qazirgi Órkendeý aýylynyń irgesinde ornalasqan. Oǵan alys-jaqyn aımaqtardan týrıster barady jáne onda arheologtar da zertteý jumystaryn júrgizip keledi.
Al Órkendeý aýylynyń tarıhyna toqtalar bolsaq, 1945-1949 jyldary osy aýmaqta Órkendi, Ekpindi, Jankent, Chkalov kolhozdary bolǵan. 1963 jyly Engels, Jdanov kolhozdary biriktirilip, Engels sovhozy quryldy. 1968 jyly Engels atyndaǵy sovhozdan Órkendeý sovhozy bólinip shyǵyp, derbes sharýashylyqqa aınaldy. Sovhozdyń alǵashqy dırektory Jetkerbaı Ábjámıev bolyp, mektep, turǵyn úıler salynyp, jańa aýyl boıyn tiktedi.
«Órkendeý aýylyna Jankent degen tarıhı ataýdyń berilýi mereıimizdi ósirdi. Bul kóptiń kókeıinde júrgen másele bolatyn. Sebebi, patsha otarshyldyǵy men Keńes zamanynda qazaqtyń jer-sý attaryn ózgertý, halyqty tarıhı jadynan aıyrý jaǵdaılary kóp boldy. Bul olqylyqtyń ornyn toltyrý úshin aýyl turǵyndary men qoǵamdastyq músheleri jınalys jasap, «Qazaly aýdany, Órkendeý aýyldyq okrýgi Órkendeý aýylyna Jankent ataýyn qaıta berý týraly» usynysty biraýyzdan qoldady», - deıdi Órkendeý aýyldyq okrýginiń ákimi Nábı Úrgenishbaı.
Aýylǵa tarıhı ataýdyń qaıta oralǵanyna turǵyndar da dán rıza. Endi olar ataǵy jer-jahanǵa áıgili Jankentten ekenin maqtanyshpen aıtyp júretin bolady.
«Elbasynyń «Bolashaqqa baǵdar: rýhanı jańǵyrý» maqalasynda «Týǵan jerdiń árbir saıy men qyrqasy, taýy men ózeni tarıhtan syr shertedi. Árbir jer ataýynyń tórkini týraly talaı-talaı ańyzdar men áńgimeler bar. Árbir ólkeniń halqyna sýyqta pana, ystyqta saıa bolǵan, esimderi el esinde saqtalǵan birtýar perzentteri bar. Osynyń bárin jas urpaq bilip ósýge tıis» degen bolatyn. Osyǵan oraı Órkendeý aýylyna eski - Jankent ataýynyń qaıta oralýyna aýyl turǵyndary, sonyń ishinde men de qýanyshtymyn. Óıtkeni bul jerde áke-anam, ata-babam ómir súrgen. Uly Jibek joly boıyndaǵy tarıhqa málim Qorqyttaı dana babamyz dúnıege kelgen aýmaq - Jankent ataýymen birge qaıta túlep, jańǵyratynyna senimdimin», - deıdi aýyldyq kitaphana meńgerýshisi Nesibeli Nuradın.
