Qazalyda jasóspirimdi uryp-soqqan 3 oqýshyǵa sot úkimi shyqty
Bıylǵy sáýir aıynda 3 oqýshy 15 jastaǵy jasóspirimdi uryp-soǵyp, saldarynan ol jedel járdem brıgadasymen aýrýhanaǵa jetkizilgen bolatyn. Buzaqylar ustalyp, aýdandyq polıtsııa bólimine jetkizildi.
Qylmystyq is Qyzylorda oblysynyń kámeletke tolmaǵandardyń isteri jónindegi mamandandyrylǵan aýdanaralyq sotynda qaraldy. Kúdiktilerge Qylmystyq kodekstiń 293-baby 2-bóliginiń 1-tarmaǵy, 107-babynyń 2-bóligi 5 jáne 8-tarmaqtary boıynsha aıyp taǵyldy.
Sotta anyqtalǵandaı, aıyptalýshylar bıylǵy 6 sáýirde, saǵat 14.00 shamasynda saıabaqta jábirlenýshi S.-men sózge kelip qalǵan. Ony qorshap alyp, aıaq tusynan teýip qulatqan. Bet tusynan tórt márte judyryqpen uryp, keýde jáne bas tusynan 2 ret tepken. Densaýlyǵyna ortasha dárejede qasaqana zııan keltirip, oqıǵa ornynan boı tasalaǵan.
Basty sot talqylaýynda aıyptalýshylardyń ekeýi óz kinásin moıyndasa, bireýi moıyndaǵan joq.
Komıssııalyq sarapshylar jasaǵan qorytyndyǵa sáıkes, eki kóziniń aınalasy men sol jaq samaıyna jaraqattyń keltirilýi, keýdesiniń isinip ketýi jáne jabyq bas-mı jaraqatyn alýy saldarynan jasóspirimniń densaýlyǵyna «jeńil» dárejede zııan tıgen. Betiniń sol jaq tusynyń jaraqaty, qabyrǵasynyń synýy, 1-shi moıyn omyrtqasynyń syrtqy jaraqattary densaýlyǵyna «orta» dárejede zııan keltirgen. Al denesindegi syrtqy jaraqattar ómirine qaýipti emes dep uıǵarylǵan.
Tergeý júrgizý barysynda jáne sotta jábirlenýshiniń ókili qandaı da bir zııannyń ornyn toltyrý jóninde ótinishpen júginbegen.
Prokýror aıyptalýshylarǵa 1 jylǵa bas bostandyǵynan shekteý jazasyn taǵaıyndaýdy surady.
«Qylmystyq kodekstiń 11-babynyń 3-bóligine sáıkes, aıyptalýshylar jasaǵan qylmystyq quqyq buzýshylyq aýyrlyǵy ortasha qylmystar sanatyna jatady. Al Qylmystyq kodekstiń 81-babynyń 7-bóligine saı, onsha aýyr emes qylmys nemese qazaǵa ushyratýmen baılanysty emes aýyrlyǵy ortasha qylmys jasaǵan kámeletke tolmaǵandarǵa bas bostandyǵynan aıyrý jazasy taǵaıyndalmaıdy.
Sot úkimimen kámeletke tolmaǵan úsh aıyptalýshy kináli dep tanyldy.
Qylmystyq quqyq buzýshylyqtar jıyntyǵy boıynsha túpkilikti 1 jylǵa bas bostandyqtarynan shekteý jazasy taǵaıyndaldy. Sot úkimi zańdy kúshine engen joq», - dep málim etti Qyzylorda oblysynyń kámeletke tolmaǵandardyń isteri jónindegi mamandandyrylǵan aýdanaralyq sotynan.
