Qazalyda ulttyq oıyndardan jarys ótkizildi

QAZALY. QazAqparat - Qazaly aýdanynda ulttyq oıyn túrlerinen jarys ótkizildi, dep habarlaıdy QazAqparat tilshisi.

Atalmysh ıgi shara Tuńǵysh Prezıdent - Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamasy negizinde uıymdastyryldy.

Maıdakól aýyldyq okrýginde teńge ilý men aýdaryspaqtan jarys ótti. Jarystyń ashylý saltanatynda aýdan ákiminiń orynbasary Álimjan Jarylqaǵanov quttyqtaý sóz sóıledi.

«Umyt bola bastaǵan ulttyq oıyndardan aýdanda tuńǵysh ret jarys uıymdastyrylyp otyr. Óskeleń urpaqty otansúıgishtikke, baýyrmaldyqqa tárbıeleıtin osyndaı asyl qazynamyzdy sanasyna sińirip ósken baladan erteń elin, jerin shynaıy súıetin, salt-dástúrin ulyqtaıtyn azamat ósip shyǵady. Dene qımylymen aınalysqan jasóspirimniń densaýlyǵy zor bolatyny sózsiz», - dedi Qazaly aýdany ákiminiń orynbasary Álimjan Jarylqaǵanov.

Aýdandyq dene shynyqtyrý jáne sport bóliminiń uıymdastyrýymen ótken ulttyq oıyndardan alǵashqy aýdan birinshiligi tartysty boldy. Aýdaryspaqtan 60-90 keli aralyǵyndaǵy jigitter jarys jolyna shyqty. Olardyń qatarynda Sharhan Tileýnazarov (60 keli), Bolat Turabaev (70 keli), Jeńisbek Musabaev (80 keli), Sáken Úmbetov (90 keli) jeńimpaz atandy. Al teńge ilýden Almat Kóbeısinniń mereıi ústem boldy. Jeńimpazdar men júldegerlerge uıymdastyrýshylardyń tarapynan aqshalaı jáne baǵaly syılyqtar tabystaldy.