Qazalyda turatyn 83 jastaǵy jelaıaq qarııa Túrkııadaǵy jarysta chempıon atandy

QYZYLORDA. QazAqparat - Qyzylorda oblysy Qazaly aýdanynyń 83 jastaǵy turǵyny Aqqoıan Yrsalıev Túrkııanyń Antalııa qalasynda ótken halyqaralyq týrnırde chempıon atandy, dep habarlaıdy QazAqparat tilshisi.

Halyqaralyq jarysta túrkııalyqtarmen birge Frantsııa, Germanııa jáne Qazaqstannan jasy seksennen asqan sportshylar qatysty. Júgirýdi jastaıynan janyna serik etken qazalylyq qarııa myńnan astam jelaıaqtyń arasynda altyn medaldi utyp aldy.

Temirjol salasynyń ardageri Aqqoıan Yrsalıev jastaıynan salaýatty ómir saltyn ustanady. Oqýshy kezinde bokspen aınalysqan. Azamattyq boryshyn áýe-desant áskeri qatarynda ótegen ol parashıýtpen 281 ret sekirgen.

Búginde qarııa ardagerler arasynda ótetin doıby, shahmat, nysana kózdeý, júgirý jarystarynda júldeli oryndar alyp júr. Sondaı-aq, kún saıyn tańerteń júgirip, jattyǵý jasaıdy. 2011 jyldan beri Almaty marafonyna qatysyp júr. 2015 jyly atalmysh jarysta altyn medal aldy.

Sergektikti serik etken qarııa kún saıyn keminde 10 shaqyrym júgiredi. Al jarysqa barar aldynda 30 shaqyrymdy baǵyndyrady.