Qazalyda termeshiler men kúıshiler baq synasty
QYZYLORDA. QazAqparat-Qazaqstan Respýblıkasy Táýelsizdiginiń 25 jyldyǵy jáne Jalańtós Bahadúrdiń 440 jyldyq mereıtoıy qarsańynda «Dombyra-dýman» atty taqyrypta aımaqtyq termeshiler men kúıshiler baıqaýy ótti, dep habarlaıdy QazAqparat aýdandyq ákimdikke silteme jasap.
Mádenı sharany Qazaly aýdanynyń mádenıet jáne tilderdi damytý bóliminiń qoldaýymen Abaı aýyldyq klýby uıymdastyrdy.
Baıqaýdy Sarykól aýyldyq okrýginiń ákimi Dıdarov Ánes quttyqtaý sózimen ashyp, barlyq qatysýshylarǵa sáttilik tiledi. Aýyldyq ardagerler keńesiniń tóraǵasy Túrikpenáli Alpamys sharanyń máni men maǵynasyna toqtaldy.
Qaı halyqta bolmasyn óziniń atadan balaǵa jetken, qadirlep, kóziniń qarashyǵyndaı saqtap, qymbat qazynasyna aınaldyrǵan ulttyq dástúrli óneri bolady. Osyndaı kıeli ónerimizdiń biri - qasıetti qara dombyranyń rýhyn asqaqtatqan termeshiler men kúıshiler saıysqa tústi. Dodaǵa Qarmaqshy, Aral, Qazaly aýdanynan talapkerler qatystyrylyp, tartysty ótti. Árbir qatysýshy talapkerler saıysta oq boıy ozyp shyǵýǵa tyrysty.
Arnaıy bekitilgen qazylar alqasynyń quramynda Qazaqstan Respýblıkasynyń Mádenıet salasynyń úzdigi, aýdandyq oqýshylar úıiniń dırektory, kúıshi Áýez Arman, aýdandyq áýez mektebiniń oqytýshysy, kúıshi-termeshi Bısenbaeva Sandýǵash, aýdandyq oqýshylar úıiniń dombyra úıirmesiniń jetekshisi Táńirbergenov Mádı bolyp, talapkerlerdiń ónerin sarapqa saldy.
Birinshi bólimde termeshiler Turmaǵanbet, Balqy bazar, Nurtýǵan, Qarasaqal Erimbettiń jyr-termelerin oryndasa, ekinshi bólimde kúıshiler Qurmanǵazy, Dına, Dáýletkereı, Qazanǵap kúılerin kúmbirletip, jınalǵan halyqty bir serpiltip tastady.
Nátıjesinde terme janry boıynsha bas júldeni Aral aýdanynan qatysqan Ómirzaq Ǵanıbet jeńip alsa, birinshi oryndy qazalylyq Balmaǵanbetov Oljabaı, ekinshi oryndy araldyq Jármenova Jańylsyn, úshinshi oryndy qarmaqshylyq baımuratov Bolat ıelendi.
Kúı janry boıynsha bas júldeni aýdandyq áýez mektebiniń oqytýshysy Serimbetov Narıman, birinshi oryndy Áıteke bı kenttik klýbynyń dombyra úıirmesiniń jetekshisi Mahambetalı Asylbek, ekinshi oryndy Basyqara aýyldyq klýbynyń dombyra úıirmesiniń jetekshisi Qosýaqov Aqylbek, úshinshi oryndy aýdandyq mádenıet Ortalyǵynyń qyzmetkeri Ómirzaq Balqyz ıelendi.
