Qazalyda sot otyrysy túnde ótti
QAZALY. QazAqparat - Qazaly aýdandyq soty «Túngi sot» pılottyq jobasyn iske qosty, dep habarlaıdy QazAqparat tilshisi.
Qazaly aýdandyq soty baspasóz qyzmetiniń ókili Aqylbek Qazybekulynyń aıtýynsha, joba aıasynda jol-kólik qozǵalysy erejelerin buzǵan materıaldar saǵat 18.30-dan 22.00-ge deıingi aralyqta qaraýdy bastap ketti.
«Ákimshilik is boıynsha avtokólik basqarýǵa quqyǵy joq kúıde azamat E. «LEXUS RX 300» markaly avtokóligin basqarǵan. Oǵan qosa, ereje buzýshy tejegish ornyna gaz pedalin basyp, turǵyn úıge soqtyǵysqan. Sonyń saldarynan jábirlenýshilerge materıaldyq shyǵyn keltirgen. Atalǵan is boıynsha taraptar ýaqyttaryn únemdeý úshin jáne isti qaraý merzimin qysqartý maqsatynda sot májilisin jumys ýaqytynan tys, ıaǵnı «Túngi sotta» qaraý týraly ótinish bildirdi», - deıdi Aqylbek Qazybekuly.
Túngi sot ákimshilik quqyq buzýshylyq týraly is boıynsha azamat E-ge Qazaqstan Respýblıkasynyń ÁQBtK-niń 610-babynyń 3-bóligimen kináli dep tanyp, oǵan 101 010 teńge aıyppul saldy.
Sot otyrysy aıaqtalǵan soń is boıynsha taraptar túngi sottyń tıimdiligin, daýdyń tez sheshilýin, ýaqyt únemdiligin, isti jumys ýaqytynda bólinbesten sheshýge múmkindik beretindigin jetkizip, oń baǵalaryn berdi.
