Qazalyda oqýshyny uryp-soǵý oqıǵasyna baılanysty polıtsııa bastyǵy qyzmetinen alynady

QYZYLORDA. QazAqparat - Qyzylorda oblysynda jasóspirimdi uryp-soǵý oqıǵasyna baılanysty Qazaly aýdandyq polıtsııa bóliminiń basshysy jáne 10 qyzmetker qatań tártiptik jazaǵa tartyldy, dep habarlaıdy QazAqparat tilshisi.

Eske sala keteıik, Qyzylorda oblysy Qazaly aýdanynda 6 sáýirde eki mektep oqýshylary arasynda janjal týyndaǵan bolatyn.

Oǵan baılanysty QR Qylmystyq kodekstiń 293-babyna sáıkes tergeý amaldary júrip jatyr.

«Tergeý barysynda jábirlenýshini uryp-soqqan barlyq jasóspirimniń jeke basy anyqtalyp, olar ýaqytsha ustaý ızolıatoryna qamaýǵa alyndy. Tıisti saraptamalar taǵaıyndalǵan. Qazir Qazaly aýdanynda krımınogendik ahýal turaqty. Balalar men jasóspirimder arasyndaǵy qylmystyń aldyn alý maqsatynda polıtsııa qyzmetkerleri reıdti jalǵastyryp jatyr. Oblystyq polıtsııa departamenti bastyǵynyń tapsyrmasymen jedel jumystar jónindegi orynbasary Qazaly aýdanynda arnaıy qurylǵan jedel shtabtyń quramynda jumys istep júr. Quqyq buzýshylyqty der kezinde anyqtap, aldyn alý sharalaryn júrgizbegen Qazaly aýdandyq polıtsııa bóliminiń basshysyn qyzmetinen bosatý jóninde QR Іshki ister mınıstrligine usynys joldandy. Taǵy 10 qyzmetker qatań sógis, sógis jáne eskertý túrinde tártiptik jazaǵa tartyldy. Qazirgi ýaqytta sotqa deıingi tergeý jalǵasyp jatyr», - dedi Qyzylorda oblystyq polıtsııa departamenti bastyǵynyń birinshi orynbasary Shamshıdın Amıtov.

Eske salsaq, budan buryn Qazalyda soqqyǵa jyǵylǵan jasóspirimniń qal-jaǵdaıy týraly jalǵan aqparat taraǵan edi.