Qazalyda mýzeılerdiń róline arnalǵan konferentsııa ótti

Mádenı shara oblystyq jáne aýdandyq qolóner sheberleriniń kórmesimen tanysýdan bastaldy. Kórmede Jańaqorǵan, Shıeli, Aral aýdandary men Qazaly aýdanynan «Jas projekt» jobasy boıynsha jeńimpaz atanyp, jumysyn bastaǵan «Marhabbat» qolóner sheberleri ortalyǵynyń buıymdary qoıyldy. Kórmege kelgen kópshilik aǵashtan oıylyp jasalynǵan qobyz, dombyra, besik, sanamaq sekildi músinder men ulttyq naqyshta tigilgen kıiz úı jabdyqtaryn, quraq kórpe, jastyq, tósenishterdi tamashalady.

Sheberler qolynan shyqqan ár buıymnyń tereń maǵynasy, aıtar syry bar. Birinen biri ótken jaýhar dúnıelerdi jasaýshylardyń biri - araldyq Shaıhy-Islam Maǵaýııauly.

«Alty jasymnan bastap saz balshyqtan tórt túlik músinin jasap kelemin. Belgili qolóner sheberi Qudaıbergen Qulmanbetovti ustazym sanaımyn. Qazaly aýdandyq ólketaný mýzeıine ózim jasaǵan saýytty syıǵa tartqanmyn. Salmaǵy jeti keli bolatyn saýyt 18 myń saqınadan turady. Ony 18 kún boıy toqyǵanmyn», - deıdi Sh.Maǵaýııauly. 

Shıeliden kelgen Qanykúl Bedenqulova kıiz úı jabdyqtarynyń qas sheberi. Onyń qolynan shyqqan basqur, alasha, shashaq baý, ýyq baý, túkti kilem, taqyr kilem búgingi kórmeniń kórkin asha tústi.

«Mektep qabyrǵasynda júrgende anamnan toqyma toqýdyń qyr-syryn meńgerip, jip ıirýdiń jón-josyǵyn úırengenmin. Qazir zeınet jasyndamyn. Áje bolǵasyn qol qýsyryp qarap otyrýǵa bolmaıdy. Qazaqtyń ulttyq qol ónerin jandandyryp, salt-dástúrin keńinen nasıhattaýdy ózime paryz sanaımyn», - deıdi tiginshi.

Budan bólek, «Rýhanı jańǵyrý» baǵdarlamasyn júzege asyrý baǵytyndaǵy mýzeılerdiń róli» taqyrybyndaǵy respýblıkalyq ǵylymı-tanymdyq konferentsııa boldy. Onda aýdan ákiminiń orynbasary Álimjan Jarylqaǵanov quttyqtaý sóz sóıledi. Sonymen qatar, Ǵanı Muratbaevtyń memorıaldyq mýzeıiniń dırektory Roza Asanova da konferentsııanyń sátti ótýine tilektestigin bildirdi.

«Mýzeı - ǵylym men bilimniń, órkenıet pen tarıhtyń, altyn ordasy. Ótkenimizben bolashaǵymyzdy baılanystyratyn altyn kópir. Shyǵys jastarynyń jalyndy jetekshisi Ǵanı Muratbaevtyń qurmetine ashylǵan memorıaldyq mýzeı 1968 jyly 7 qarashada negizin qalady. Mýzeı ǵımaratyna Qazaly qalalyq birinshi saılanǵan eńbekshiler depýtattarynyń keńsesi bolǵan úı berildi. Bul ǵımarat oblystyq dárejedegi tarıhı-mádenı eskertkishter qatarynda. Aýdanda mýzeı ashýdy qoldaǵan, sol kezdegi Qazaly aýdandyq atqarý komıteti tóraǵasynyń orynbasary Teńel Jumabaevtyń eńbegi zor. Ǵanıdyń tikeleı zertteýshisi Seıilhan Asqarovtan materıaldar alý arqyly mýzeıdiń irgetasy qalanǵan. Bul kisilerdiń eńbegin aıtpaı ketýge bolmas», - deı kele, mýzeıdi basqarǵan dırektorlardyń eńbegine toqtaldy.

Konferentsııaǵa tarıh ǵylymdarynyń doktory, Ál-Farabı atyndaǵy Qazaq Ulttyq ýnıversıtetiniń professory Táttigúl Qartaeva, tarıh ǵylymdarynyń phd doktory Ázilhan Tájekeev, Shalqar aýdandyq tarıhı-ólketaný mýzeıiniń ekskýrsovody Gúlsara Seıilova, memlekettik «Ejelgi Taraz eskertkishteri» tarıhı-mádenı qoryq mýzeıiniń aǵa ǵylymı qyzmetkeri Jazıra Shildebaeva, Qyzylorda oblystyq tarıhı-ólketaný mýzeıiniń ǵylymı hatshysy Saılaý Ashat jáne basqa da ǵalymdar men ólketanýshylar qatysyp, ǵylymı paıymdaryn ortaǵa saldy.