Qazalyda mektep aýmaǵyn sý basty
QYZYLORDA. QazAqparat - Qyzylorda oblysyndaǵy Qazaly aýdanyna qarasty Arandy aýylynda №97 mektep aýmaǵyn keshe, 11 naýryzda sý basty. Osyǵan baılanysty atalmysh bilim uıasynda sabaq toqtatyldy, dep habarlaıdy QazAqparat óńirlik kommýnıkatsııalar qyzmetine silteme jasap.
Oblys əkiminiń orynbasary Serik Súleımenov, oblystyq jumyldyrý daıyndyǵy basqarmasynyń basshysy Serik Sermaǵambetov jəne oblystyq tótenshe jaǵdaılar departamentiniń bastyǵy Omar Berjanov bastaǵan jumys toby aımaqtyń soltústik aýdandarynda sý tasqynynyń aldyn alý jumystaryn pysyqtaý barysynda Arandydaǵy №97 mektepke baryp, nysannyń jaǵdaıymen tanysty.
Komıssııa músheleri sý alǵan aýmaq pen mektep ǵımaratyn kórgen soń ǵımaratqa túsken syzat pen edenniń kóterilip ketýine baılanysty oqý protsesin toqtatý týraly sheshim qabyldady.
Oblys əkiminiń tapsyrmasyna səıkes qurylǵan sarapshylar komıssııasy mekteptiń tehnıkalyq jaǵdaıyn keshendi túrde zerttep, oqıǵanyń sebebin anyqtaıdy. Oblystyq bilim basqarmasy oqýshylardyń bilim alý protsesi toqtamaıtynyn məlimdedi. 12 naýryzdan bastap mektep muǵalimderi men 98 oqýshysy kórshiles Qojabaqy aýylyndaǵy №25 mektepte ekinshi aýysymda oqıtyn boldy. Ustazdar quramy men oqýshylardy tasymaldaý úshin Qazaly aýdany əkimdiginen arnaıy kólik bólindi», delingen óńirlik kommýnıkatsııalar qyzmeti taratqan habarlamada.
Ádilet Qańtarbaev
