Qazalyda kóshe boıynda kitaphana ashyldy
QAZALY. QazAqparat - Qazaly aýdanynyń ortalyǵy Áıteke bı kentinde «kóshe kitaphanasy» ashyldy, dep habarlaıdy QazAqparat tilshisi.
Qazalylyqtar kóshe kitaphanasy jobasyn qolǵa aldy. Aýdan ákimi Murat Ergeshbaev jazýshy Ábish Kekilbaevtyń «Adamdy adam etken - kitap, adamzat etken - kitaphana» degen danalyq sózin mysalǵa keltire otyryp, kóshe kitaphanasynyń jumysyna sáttilik tiledi. Onyń osy sharaǵa ákim ǵana emes, oqyrman, aýdan turǵyny retinde qatysyp, janashyrlyq tanytýy, oqyrmandarmen erkin pikir alysýy, sýretke túsip, qarapaıymdylyq úrdisin saqtaýy da kópshilikke jyly áser qaldyrdy.
Oblys kóleminde tuńǵysh ret uıymdastyrylyp otyrǵan bastamanyń negizgi maqsaty kópshiliktiń kitap oqýǵa, kitap almasýǵa shaqyrý. Sol arqyly adamnyń jan dúnıesin baıytý, bilimge dańǵyl jol ashý, jańa ıdeıalarǵa kilt tabý, rýhanı qundylyqtarǵa qol jetkizý bolyp tabylady.
«Áldeneshe jerde ornalasqan kóshe kitaphanasy arqyly aýdan turǵyndary ózderi kútken qoǵamdyq kólik kelgenshe kitapty oqýǵa nemese ózimen birge unaǵan kitabyn alyp ketýine, keıin qaıtaryp berýine, bolmasa ózge kitappen aýystyryp oqýǵa múmkindigi bar. Ári bul úshin eshqandaı qujat talap etilmeıdi de oqyrman bıleti de suralmaıdy. Barshasy kitap alǵan adamnyń jaýapkershiligine baılanysty», - deıdi aýdandaǵy ortalyqtandyrylǵan kitaphanalar júıesiniń dırektory Indıra Nazarova.
«Kóshe kitaphanasynyń» ashylý saltanatynda turǵyndardyń biri Muńsyzbaı Áýbákirov óziniń jeke kitaphanasynan kitap syıǵa tartty.
