Qazalyda kópqabatty úıdegi órtten 5 jasar bala kóz jumdy
QYZYLORDA. QazAqparat - Qyzylorda oblysynda kópqabatty úıde bolǵan órtten bes jastaǵy ul bala kóz jumdy, dep habarlaıdy QazAqparat tilshisi.
Oqıǵa 13 maýsym kúni saǵat 18.39-da Qazaly aýdanynyń ortalyǵy Áıteke bı kentindegi bes qabatty úıdiń tórtinshi qabatyndaǵy páterde boldy. Páterdegi kıimder men jıhazdardyń órtenýinen jalyn 16 sharshy metr aýmaqqa jaıylǵan.
«Órt saldarynan bólme ishine taraǵan kómirqyshqyl gazynan bes jastaǵy ul bala kóz jumdy. Tótenshe jaǵdaılar salasy mamandarynyń kúshimen kópqabatty úıden segiz adam qutqaryldy. Onyń ishinde ekeýi bala. Sondaı-aq, oqıǵa ornynan syıymdylyǵy 50 lıtrlik eki gaz ballony syrtqa shyǵaryldy. Órt saǵat 19.10-da tolyqtaı sóndirildi. Órttiń shyǵý sebebi anyqtalýda», - dep málim etti oblystyq Tótenshe jaǵdaılar departamenti órt sóndirý jáne avarııalyq qutqarý jumystary qyzmetinen.
Illıýstratsııalyq foto
