Qazalyda qaıyrymdy jandar 5 otbasyna úı salyp jatyr
«Asyl-Iman-Ihsan» qoǵamdyq qory baspanasyz júrgen otbasylarǵa úı salyp berýde.
«Qaı qoǵamda bolsyn mánin de, ózektiligin de joımaıtyn bir qundylyq bar ekeni ras. Ol - qaıyrymdylyq. Dúıim jurtshylyqqa tanymal «Óner qyrandary» teatrynyń músheleri «Qareket» qaıyrymdylyq qory arqyly qanshama jandarǵa baspana syılap, júrek jylýyn tartý etken qaıyrymdy ister jóninde áleýmettik jelilerden kóp baıqaımyz. Desek te, qaıyrymdylyq jasaýǵa jany qumar, jaratqannyń saýabyn alý úshin jaqsylyqqa asyǵyp turatyn jandar aýdanda da kóptep kezdesedi. Sondyqtan, Qazalyda ortalyq «Janqoja batyr» meshiti namazhandarymen bastama kóterip, «Qareket» qaıyrymdylyq qory sekildi «Asyl-Iman-Ihsan» qoǵamdyq qoryn ashtyq», - deıdi atalǵan Qordyń basshysy Sábıt Aralbaev.
Qazirgi kúnge deıin qoǵamdyq qor bir otbasynyń turǵyn úıine kúrdeli jóndeý jumystaryn jasasa, bir otbasyna eki bólmeli úı salyp bergen. Birqatar turmysy tómen jandarǵa azyq-túlikpen kómek kórsetip, baspana máselesi qıyn jandarǵa qol ushyn berip úlgergen.
Qazaly aýdanynyń ákimi Murat Ergeshbaev bastamamen tanysý maqsatynda salynyp jatqan turǵyn úıge at basyn burdy. Bundaı ıgi bastamaǵa sáttilik tileı otyryp, jumystyń qarqyndy júzege asyrylýyna baılanysty «Asyl-Iman-Ihsan» qory, Qazaly aýdanynyń ákimdigi, aýdandyq turǵyn úı kommýnaldyq sharýashylyǵy, jolaýshylar kóligi jáne avtomobıl joldary bólimimen úshjaqty memorandýmǵa otyrýdy usyndy. Sonymen birge, jaqsylyqqa baǵyttalǵan jumystarǵa qoldaý bildiretinin jetkizdi.
Sondaı-aq, «Úıi joqtyń kúıi de joq» demekshi, baspana máselesi ábden tyǵyryqqa tiregen otbasylar úshin Áıteke bı kentinen 5 otbasyna arnap shaǵyn baspana salynýda.