Qazalyda kásipker áıelderdiń bıznes-forýmy ótti
QAZALY. QazAqparat - búgin Qazaly aýdanynda jyl saıyn dástúrli túrde uıymdastyrylatyn kásipker áıelder bıznes-forýmy ótti, dep habarlaıdy QazAqparat.
Forýmnyń negizgi maqsaty - aýdandaǵy názik jandylardyń qoǵamdyq ómirdegi belsendiligin arttyrý, olardyń bızneske aralasýyna qoldaý kórsetý jáne ekonomıkalyq múmkindikterin keńeıtý.
Sharaǵa 40-qa jýyq kásipker qyz-kelinshekter, Aral, Qarmaqshy aýdandarynan arnaıy ókilder qatysty. Sondaı-aq, forým aıasynda isker hanymdardyń jasaǵan buıymdarynan kórmege uıymdastyryldy. Jıynǵan Qazaly aýdanynyń ákimi Murat Ergeshbaev qatysyp, forýmǵa qatysýshylardy 8 naýryz - Halyqaralyq áıelder kúnimen quttyqtap, jumystaryna sáttilik tiledi.
«Áıelder qaı salada qyzmet etpesin, sol salany damytyp, nyǵaıtýǵa erekshe úles qosyp, kópshilik qurmetine bólenip keledi. Ekonomıkany qalyptastyrýdyń ótpeli kezeńderinde aýdanymyzda kásipkerliktiń óristeýine áıel azamatshalardyń negiz qalaǵandyqtaryn atap ótkim keledi», - dedi Murat Nálqojauly.
Sondaı-aq, forýmda Qyzylorda oblysynyń kásipkerlik jáne týrızm basqarmasynyń bıznesti damytý men qoldaý bóliminiń basshysy Máýe Ońdalyqyzy, «Jobalarǵa saraptama júrgizý ortalyǵy» JShS-niń dırektory Lázzat Jarmaǵambetqyzy, «Konsaltıngtik kompanııa PREKO Kyzylorda» jaýapkershiligi shekteýli seriktestiginiń dırektory Madına Erǵalıqyzy, «Damý» kásipkerlikti damytý qory» aktsıonerlik qoǵamynyń Qyzylorda oblysy boıynsha aımaqtyq fılıalynyń bas mamany Indıra Keńshilikqyzy, «Qyzylorda» Óńirlik ınvestıtsııalyq ortalyǵy» MQU» JShS-niń bólim basshysy Murat Bahytuly baıandama jasady.
Shara barysynda birqatar isker áıelder aýdan ákiminiń Alǵys hatymen marapattaldy. Saltanatty jıyn sońynda er-azamattar qaýymy analarymyzǵa gúl syılap, merekelik kóńil kúıge bóledi.
Aıta keteıik, Qazaly aýdanynda «Bıznestiń jol kartasy - 2020» baǵdarlamasy aıasynda ótken jyly 12 joba júzege asyrylsa, onyń ishinde 4 kásipker áıel 100 mln teńgege jýyq nesıe alyp, óz kásipterin iske asyrýda.
Budan bólek, granttyq qarjylandyrý aıasynda 15,0 mln teńgeni quraıtyn qaıtarymsyz grantqa ıe bolǵan 19 kásipkerdiń 11-i názik jandylar. «Bastaý Bıznes» jobasy aıasynda oqý kýrsynan ótken qatysýshylardyń 40,0 paıyzyn (220/87) áıel azamatshalar qurap otyr.
