Qazalyda karantınge qaramastan muǵalimder mektepte jınalys ótkizgen

QYZYLORDA. QazAqparat - Qyzylorda oblysy Qazaly aýdanyndaǵy mektep-gımnazııada karantın ýaqytynda kóp adam jınalǵan ustazdar jınalysy ótken. Bul jıyndy arnaıy jasaqtalǵan monıtorıng tobynyń músheleri toqtatty, dep habarlaıdy QazAqparat tilshisi.

Qyzylorda oblysynda bul baǵytta barlyǵy 24 monıtorıng toby jumys jasaıdy. Osy maqsatta mamandar tarapynan reıd ótkizilip, 803 nysan qamtyldy.

Nátıjesinde 29 karantın talabyn buzý faktisi anyqtaldy.

Onyń ishinde qoǵamdyq tamaqtaný oryndarynda - 20 buzýshylyq, úı jaǵdaıynda uıymdastyrylǵan merekelik-kópshilik is-sharalar sany - 7, bilim berý nysandaryndaǵy karantın talaptaryn buzýshylyq - 1, medıtsınalyq mekemede - 1 derekti quraıdy.

Karantın talabyn buzýshylyqtyń basym bóligi qoǵamdyq tamaqtaný oryndaryna qatysty anyqtalǵan.

Atap aıtqanda, 9 kásipkerlik sýbektisi ýaqyt shekteýine qaramastan jumysyn jalǵastyrǵan.

Al 3 nysannyń personaly jeke qorǵanysh quraldarynsyz (maska) halyqqa qyzmet kórsetken.

Sonymen qatar, shamadan tys adam jınap, is-shara ótkizý boıynsha 8 karantın talabyn buzý faktisi tirkeldi.

«Monıtorıng toptarynyń reıd tekserisimen tek kásipkerlik nysandar ǵana emes, bilim nysandary men emdeý mekemeleri de qamtylýda. Reıd barysynda jumysshy top Qazaly aýdanyndaǵy mektep-gımnazııada shamadan kóp adam jınalǵan ustazdar jınalysyn toqtatty. Sonymen qatar, osy aýdandaǵy dárigerlik ambýlatorııada dene qyzýyn ólsheý quralyn tekserý men tirkeý jýrnalynyń joq ekendigi anyqtaldy. Esepke alynǵan karantın talabyn buzý faktileri boıynsha jalpy somasy 2 435 695 teńgege ákimshilik aıyppul salyndy», - dep málim etti Qyzylorda oblysynyń sanıtarııalyq-epıdemıologııalyq baqylaý departamentiniń baspasóz qyzmeti.

Esterińizge sala ketelik, Qyzylorda oblysynda bes kúnde 460 adam vaktsına alǵanyn habarlaǵan edik.