Qazalyda erekshe aǵashtar ósýde
QAZALY. QazAqparat - Qyzylorda oblysynyń Qazaly aýdany týıa, aılant, katalpa, úıeńki syndy erekshe aǵashtardy jersindirýde, dep habarlaıdy QazAqparat tilshisi.
Orman sharýashylyǵynyń mamandary úsh jyl buryn japyraǵy erekshe jaıqalyp turatyn týıa aǵashynyń tuqymyn ákep ekken. Alǵashynda jergilikti tabıǵatqa beıimdele almaǵanymen, kútip-baptaýdyń arqasynda jersindirildi. Qazir kóshetterin kóbeıtý jumystary júrip jatyr. Taýly aımaqta ósetin aılant pen katalpa aǵashtary da Qazaly kóshesiniń kórkin kirgizetin bolady.
«17 gektar jerdi alyp jatqan «Oıaz» baǵynda jyl saıyn saıa aǵashtardyń 35 myń túp kósheti ósiriledi. Teńdeı jartysy mekemelerge tegin úlestiriledi. Qalǵany satylady. Jalpy, kóshet daıyndaýmen 75 adam aınalysady», - deıdi aýdandyq orman sharýashylyǵy mekemesiniń dırektory Ardaq Kádir.
Al Orman sharýashylyǵy jáne janýarlar dúnıesi komıtetiniń aýdandaǵy fılıalynda Aral teńiziniń ultanyna egiletin sekseýildiń kóshetteri daıyndalady. Munda jalpy sany 900 myń dana sekseýil kósheti ósiriledi. Tuqym negizinen alpys kúnnen artyq saqtalmaıdy eken. Qazir mamandar onyń merzimin uzartý boıynsha tájirıbe jasap kórýde.
