Qazalyda 80 jastaǵy jelaıaq qarııa turady
QAZALY. QazAqparat - Qazaly aýdanynyń 80 jastaǵy turǵyny Aqqoıan Yrsalıev kúnine 12 shaqyrym júgiredi, dep habarlaıdy QazAqparat tilshisi.
Temirjol salasynyń ardageri Aqqoıan Yrsalıev jastaıynan salaýatty ómir saltyn ustanady. Oqýshy kezinde bokspen aınalysqan. Al Otan aldyndaǵy azamattyq boryshyn áýe-desant áskeri qatarynda ótep, parashıýtpen 281 ret sekirgen eken. Kúni búginge deıin ózin jaǵymsyz ádetterden aýlaq ustap keledi jáne ardagerler arasynda ótetin doıby, shahmat, nysana kózdeý, júgirý jarystaryna turaqty túrde qatysyp, júldeli oryndar alyp júr. Sondaı-aq, kún saıyn tańerteń júgirip, jattyǵý jasaıdy.
«1988 jyly Qapal-Arasan shıpajaıynda demaldym. Sonda qaıratker Dinmuhamed Qonaev ta demalyp jatyr eken. Ol kisimen tanystym. Zııaly, salmaqty adam. Ekeýmiz kúnde eki shaqyrym júgiretin bolyp kelistik. Osyndaı uly adammen qysqa ýaqyt bolsa da dıdarlasyp qalǵanyma qýanamyn. Al 2011 jyldan beri Almaty marafonyna qatysyp júrmin. Marafonshylar ártúrli dıstantsııa boıynsha júgiredi. Men ótken jylǵy marafonda 22 shaqyrymdy baǵyndyrdym. 70 jastan asqan adamdar arasynan birinshi oryndy jeńip aldym. Al bıylǵy Almaty halyqaralyq marafon jarysynda 1780-shi bolyp tirkelip, 21 shaqyrymdy 3 saǵat 15 mınýtta júgirip óttim. Sóıtip, altyn medalǵa ıe boldym. Medaldi qala ákimi Baýyrjan Báıbek tapsyrdy. Basqa da jetistikterim jeterlik. Munyń bári tyńǵylyqty daıyndyqtyń arqasy. Sebebi, kún saıyn keminde 10 shaqyrym júgiremin, al marafonnyń aldynda 30 shaqyrymdy baǵyndyramyn», - dedi Aqqoıan Yrsalıev.
Qazaly aýdandyq ardagerler keńesiniń tóraǵasy Orazǵalı Bekbanov jelaıaq qarııanyń shapshań qozǵalatynyn, kóńili sergek, minezi elgezek ekenin aıtady.
«Marafon jarysyna Aqqoıandy shyǵaryp salarda «Syr óńiriniń namysyn qorǵaýǵa bara jatqan jalǵyz ardagersiń, oryn alyp keletinińe senemin» dep úmit artqanmyn. Senimdi aqtap, bizdi qýantyp tastady. Sportty serik etken, qaırat-jigeri myqty osyndaı qarııalar jastarǵa úlgi bolady», - deıdi O.Bekbanov.
