Qazaly turǵyny úıiniń aldyna jylyjaı saldy
QAZALY. QazAqparat - Qyzylorda oblysy Qazaly aýdanynyń turǵyny Qanat Ibragımov úıiniń aldyna jylyjaı jasap, qııar ósirýde, dep habarlaıdy QazAqparat tilshisi.
Qııar ósirýge qyzyqqan Qanat Reseı elinen polıkarbonat materıalyn ákelip, jylyjaı salǵan. Jýyrda Qanat Ibragımov «Damý» qory arqyly úsh jarym mıllon teńge nesıe alyp, jylyjaıdyń jylý júıesin jóndep jatyr.
«Jylyjaıdyń ishi jyl on eki aı jyly bolýy tıis. Qazir osy maqsatta jumys istep jatyrmyn. Sondaı-aq, esik ashylǵan sátte birden salqyn aýa soqpaýy úshin jylyjaıdyń aldyna kishi bólme saldym. Men tek qııar ósiremin. Óıtkeni, ár kókónistiń kúıi bólek. Máselen, qııar ylǵaldy súıedi. Onyń qasyna qurǵaq aýada ósetin kókónisti otyrǵyza almaısyń. Qııardyń birneshe túrin ósirip kórdim. Barlyǵynyń shyǵymy jaqsy. Alda josparym kóp. Jylyjaıdy keńeıtý oıda bar. Júıesin tapsań, jumys kóp qoı», - deıdi Qanat.
Kásipkerdiń úıiniń aýlasyndaǵy jylyjaıdyń uzyndyǵy - 14, eni - 4 metr. Munda qııarlar tamshylatyp sýarý tásili arqyly sýarylady.
