Qazaly turǵyny 7 gektarǵa jemis baǵyn ekti
QAZALY. QazAqparat - Qazaly aýdanynyń ortalyǵy - Áıteke bı kentiniń turǵyny Nábı Jıdebaı 7 gektar jerge alma, almurt jáne júzim kóshetterin ekti, dep habarlaıdy QazAqparat tilshisi.
Tuńǵysh Prezıdent - Elbasy Nursultan Nazarbaev «Bolashaqqa baǵdar.: rýhanı jańǵyrý» baǵdarlamasynda «Týǵan jer» baǵyty arqyly kógaldandyrý mán berilýi tıis ekenin atap kórsetken. Sondaı-aq, týǵan jerge degen súıispenshilik- Qazaqstanǵa degen patrıottyq sezimge ulasatynyn aıtyp ótken bolatyn.
Qazaly aýdany ákimdigi baspasóz qyzmetiniń habarlaýynşa, Nábı Jıdebaı Basyqara aýylynan bes shaqyrym jerdegi eski darııanyń ornynan alma baq ósirýdi qolǵa alǵan.
«Byltyr aýktsıon arqyly Basyqara aýylynan 50 gektar jer aldym. Osylaısha kópten oıda júrgen isti bastadym. Mezgilinde úı irgesine túrli jemis-jıdekter otyrǵyzdym. Tipti, qaıbir jyly 15 túpteı júzimnen bir tonnaǵa jýyq ónim alǵan edim. Keıin sharbaqtan úı turǵyzatyn bolyp, bárin kesip tastaýǵa týra keldi. Sonymen syrttan jer alyp, jemis-jıdek ósirýdi qolǵa aldym», - dedi Nábı Jumabaıuly.
Búginde Nábı byltyr 5 gektar alqapqa 200 túp alma, almurt, 300 túp júzim jáne 20 túp qyzyl shıe kóshetin otyrǵyzǵan. Baǵban kóshetterdi Túrkistan oblysynyń Saryaǵash aýdanynan aldyrdy. Onyń aıtýynsha, alma, almurttyń bul sorty qysqa tózimdi.
Baǵbannyń endigi maqsaty - sol alma, almurttan mol ónim alý. Qazir ol ár aǵashty jeke-jeke qarap, baptap, kútip júr. Atalǵan alma, almurt sortynyń tolyq jemis berýine birshama ýaqyt kerek.
«Qansha eńbek etseń sonsha ónim alasyń. Barlyǵy «alma men almurtty egip qoısań, ózi ósip, ónim beredi» dep oılaıdy. Alaıda ol olaı emes. Árbir túp jemis aǵashyn balańa qaraǵandaı kúni-túni aıalaýyń kerek. Túbin jumsartyp, ýaqytyly dári-dármek pen dárýmenin beresiń. Túrli keselden qorǵaısyń. Mıneraldy tyńaıtqysh pen dári-dármekti ólshemimen bermeseń, qýratyp, óltirip alýyń múmkin. Sóıtkende ǵana beınetińniń zeınetin kórip, tabysqa kenelesiń», - deıdi baǵban.
Baǵban jemis aǵashyna aıaqsýdy Syrdarııa ózeninen sorǵy arqyly alyp, tamshylatý ádisimen sýarýda. Bul úshin arnaıy apparat pen qajetti qural-jabdyqtaryn aldyrǵan.
Eńbekqor baǵbannyń alǵa qoıǵan maqsaty kóp. Onyń aıtýynsha, memleket tarapynan qoldaý bolatyn bolsa, jylyjaıda kókónis ósirýmen de aınalysý oıynda bar.
Eske sala ketsek, buǵan deıin Shıelide kásipker 20 myń túp alma aǵashyn ekkenin habarlaǵan edik.
