Qazaly temirjol aýrýhanasy jańa quraldarmen jabdyqtaldy
QYZYLORDA. QazAqparat - Qyzylorda oblysynyń Qazaly aýdanyndaǵy temirjol aýrýhanasy tolyqtaı jańa medıtsınalyq quraldarmen jabdyqtaldy. Jańa qurylǵylar endoskopııa, bıohımııa, aýdıometrııa zertteýlerin jáne basqasyn júrgizýge múmkindik beredi. Aýrýhana jumysymen oblys ákimi Qyrymbek Kósherbaev tanysty. Bul týraly oblystyq ákimdiktiń baspasóz qyzmeti habarlady.
Temirjol aýrýhanasy jergilikti aýdannyń turǵyndaryna jáne Qazaly, Aral, Qarmaqshy aýdandarynda turatyn temirjolshylarǵa, olardyń januıalaryna, temirjolshy zeınetkerlerge kópsalaly mamandandyrylǵan, alǵashqy medıko-sanıtarlyq, konsýltatsııalyq-dıagnostıkalyq medıtsınalyq kómek kórsetedi. Munda kásibı deńgeıi joǵary dárigerler jumys jasaıdy. Ótken jyly 2 385 emdelýshige qyzmet kórsetildi.
- Osy qurylǵylardyń arqasynda ót qaltasyna jáne kıstomaǵa, appendıtsıtke laparoskopııalyq jolmen, kompıýterlik tomograf, ÝDT jáne «S-dýga» rentgendıagnostıkalyq kesheni kómegimen otalar jasaý engizildi, barlyq klınıkalyq bıohımııalyq saraptamalar analızatorlarda jasalady. Sondaı-aq reanımatsııalyq bólimshede shuǵyl naýqastarǵa qysqa merzimde dıagnoz qoıý men olardy ýaqytyly emdeýge múmkindik týdy, - deıdi aýrýhananyń bas dárigeri Qubyl Rshymbetov.
Aıta keteıik, bıyldan bastap aýrýhanada neıroınsýlttik jáne ońaltý bólimshesi ashylmaq. Qazirdiń ózinde neıroınsýlttik naýqastardy der kezinde qabyldap, jedel medıtsınalyq kómek kórsetý úshin tıisti qural-jabdyqtar men qurylǵylarmen, dári-dármektermen, tasymaldaýǵa arnalǵan arbalarmen jáne lıftimen tolyq jabdyqtalǵan. Úlken jáne kishi operatsııalyq zaldar táýlik boıy neırohırýrgııalyq operatsııalar jasaý úshin daıyndalyp, arnaıy jabdyqtarmen qamtamasyz etilgen. Reanımatsııalyq-anestezıologııalyq bólimshe 6 tósekke keńeıtilip, osy zamanǵy qondyrǵylarmen jabdyqtalǵan neırohırýrgııalyq operatsııalardan keıingi 4 tósektik palata ashyldy.
