Qazaly mańynda armenııalyq azamattyń júk kóligi órtendi

QAZALY. QazAqparat - Qyzylorda oblysy aýmaǵyndaǵy «Shymkent-Samara» tas jolynyń boıynda armenııalyq azamattyń júk kóligi otqa orandy, dep habarlaıdy QazAqparat tilshisi.

Oqıǵa 26 tamyzda saǵat 16.23-te Qazaly aýdanynda boldy. Jergilikti №9 órt sóndirý bólimniń baılanys beketine habar kelip túsken. Onda aýdan ortalyǵy - Áıteke bı kentine jaqyn «Shymkent-Samara» tas jol boıynda ornalasqan «Arzan» kesheniniń mańynda júk kóliginiń janyp jatqany aıtylǵan.

«Órt sóndirýshiler dereý oqıǵa ornyna jetti. Oqıǵa ornynda Armenııadan Almaty qalasyna baǵyt alǵan «Iveco» júk kóligine tıelgen plıntýstar janǵany anyqtaldy. Oqıǵa ornyna №9 Órt sóndirý bóliminen 4 qyzmetker órt sóndirý kóligimen keldi. Mamandar júk avtokóliginiń tolyq janýyna jol bergen joq. Tilsiz jaý 16.38-de oqshaýlanyp, 17.00-de tolyq sóndirildi. Avtokólik ıesi Armenııa azamaty ekendigi belgili boldy. Órttiń shyǵýy sebebi men shyǵyny anyqtalýda», - dep málim etti Qyzylorda oblystyq tótenshe jaǵdaılar departamentiniń baspasóz qyzmetiniń jetekshisi Aıgúl Nurmanova.

Sondaı-aq, buǵan deıin Qyzylordada dostarymen balyq aýlaýǵa shyqqan 55 jastaǵy azamat sýǵa batyp ketkendigi habarlanǵan bolatyn.